Chiranjeevi: సేవా దృక్పథంతో చేసే పనుల వెనుక కూడా స్వార్థాన్ని వెతికే వికృత సమాజంపై మెగాస్టార్ చిరంజీవి తీవ్ర స్థాయిలో స్పందించారు. ఎన్నో ఏళ్లుగా సమాజ సేవలో భాగమైన ‘చిరంజీవి బ్లడ్ బ్యాంక్’పై కొందరు వ్యక్తులు చేసిన నీచమైన ఆరోపణలను ఆయన తీవ్రంగా ఖండించారు. తన సినీ ప్రస్థానం 48 వసంతాలు పూర్తి చేసుకున్న సందర్భాన్ని పురస్కరించుకుని ఏర్పాటు చేసిన ‘మెగా యూత్ ఫోర్స్’ వేదికపై చిరంజీవి చేసిన కామెంట్స్ ఇప్పుడు సర్వత్రా చర్చనీయాంశంగా మారాయి.
తాను సాధించిన విజయాల వెనుక ఎన్నో అవమానాలు, గుండెకోతలు ఉన్నాయని చిరంజీవి గుర్తు చేసుకున్నారు. “బ్లడ్ బ్యాంక్ స్థాపించి రక్తం అమ్ముకుంటున్నానంటూ కొందరు మూర్ఖులు పనిగట్టుకుని నాపై విషం చిమ్మారు. సినిమాల్లో నాకు లభించే రెమ్యునరేషన్ స్థాయి ఏమిటో అందరికీ తెలుసు. మరి నేను తీసుకునే ఆ పారితోషికంతో సరితూగాలంటే ఎన్ని కోట్ల బ్లడ్ ప్యాకెట్లు అమ్మాల్సి వస్తుంది? కనీస విచక్షణ లేకుండా మాట్లాడారు” అంటూ ఆవేదన వ్యక్తం చేశారు. ఎవరి వద్ద చేయి చాచకుండా, రూపాయి విరాళం కూడా ఆశించకుండా తన సొంత కష్టార్జితంతోనే సేవా కార్యక్రమాలను నడిపిస్తున్నట్లు ఆయన స్పష్టం చేశారు. ఈ బృహత్తర కార్యంలో తనకంటే ఎక్కువగా ప్రాణాలు నిలబెట్టేందుకు ముందుకు వచ్చిన అభిమానుల త్యాగమే అత్యున్నతమైనదని, దానికి ఏ విలువా కట్టలేమని తేల్చి చెప్పారు.
విమర్శలను, అవమానాలను తలకెక్కించుకుంటే మనిషి అక్కడే ఆగిపోతాడని యువతకు మార్గనిర్దేశం చేశారు. “మిమ్మల్ని కిందకు లాగే విమర్శల గురించి ఆలోచిస్తూ కూర్చుంటే జీవితంలో ఎన్నటికీ ముందుకు సాగలేరు. లక్ష్యం వైపు గురిపెట్టి అడుగులు వేయండి. నాపై కేవలం అభిమానం చూపడం మాత్రమే కాదు, నేను ఏ క్రమశిక్షణతో, ఏ ఆలోచనా విధానంతో ఈ స్థాయికి ఎదిగానో గ్రహించండి. చిరంజీవి అభిమాని అంటే సమాజంలో గర్వంగా తలెత్తుకునేలా ఉండాలి” అని పిలుపునిచ్చారు. 1978 సెప్టెంబర్ 22న విడుదలైన ‘ప్రాణం ఖరీదు’ చిత్రంతో మొదలైన తన నట ప్రస్థానం నాలుగు దశాబ్దాలు దాటి అప్రతిహతంగా కొనసాగుతోందని చిరంజీవి గుర్తు చేసుకున్నారు. ఈ సుదీర్ఘ కాలంలో తనకు వెన్నుదన్నుగా నిలిచిన ప్రతి దర్శకుడికి, నిర్మాతకు, సినీ కార్మికులకు, ప్రేక్షక దేవుళ్లకు ఆయన హృదయపూర్వక కృతజ్ఞతలు తెలిపారు. చివరి శ్వాస వరకు తన అభిమానులను, ప్రేక్షకులను సరికొత్త సినిమాలతో రంజింపజేయడమే తన ప్రధాన కర్తవ్యమని పేర్కొన్నారు. ప్రస్తుతం చిరంజీవి ‘విశ్వంభర’ చిత్ర నిర్మాణానంతర పనులతో పాటు, ‘కాకా’ షూటింగ్లో శరవేగంగా పాల్గొంటున్నారు.