Vijay Deverakonda: కమర్షియల్ లెక్కలు, రికార్డు కలెక్షన్ల వేటలో పడి కొట్టుకుపోతున్న చిత్ర పరిశ్రమలో రౌడీ హీరో విజయ్ దేవరకొండ చేసిన వ్యాఖ్యలు ఇప్పుడు ఇండస్ట్రీ వర్గాల్లో సంచలనంగా మారాయి. రాహుల్ సంకృత్యాన్ దర్శకత్వంలో తెరకెక్కిన భారీ పీరియడ్ యాక్షన్ డ్రామా ‘రణబాలి’ విడుదలైన అనంతరం హైదరాబాద్‌లో నిర్వహించిన సక్సెస్ ప్రెస్ మీట్‌లో విజయ్ దేవరకొండ అత్యంత భావోద్వేగంతో మాట్లాడారు. సినిమా రిజల్ట్‌పై వస్తున్న విభిన్న అభిప్రాయాలు, కలెక్షన్ల నంబర్లపై విజయ్ నేరుగా స్పందిస్తూ “ఈ సినిమా మేము చేసినప్పుడు ఏదో హిట్ కొట్టేయాలని, లేదా పెద్ద పెద్ద బాక్సాఫీస్ రికార్డు నంబర్లు సాధించాలని చేయలేదు” అని కుండబద్దలు కొట్టారు. ప్రేక్షకుల హృదయాల్లో నిలిచిపోయే ఒక బలమైన కథను ప్రపంచానికి చూపించడమే తమ ప్రధాన లక్ష్యమని స్పష్టం చేశారు.
ప్రపంచం ఈ చిత్రాన్ని ఎలా చూస్తుంది, రేపు రివ్యూలు ఎలా వస్తాయనే భయాలు, లెక్కలు లేకుండా ముందుగా చిత్ర యూనిట్‌లోని 20–25 మంది కూర్చుని సినిమాను స్వయంగా వీక్షించామని విజయ్ వెల్లడించారు. “ఒక సినిమా ప్రపంచంలోకి వెళ్లాక లక్షలాది మంది రకరకాల లెన్స్‌లతో చూస్తారు. వారి అభిప్రాయాలు వేరుగా ఉంటాయి. కానీ మేం ఏ ఉద్దేశంతో మొదలుపెట్టాం, ఏం సాధించామనేది స్వచ్ఛంగా చూడాలనుకున్నాం. సినిమా చూశాక నా మనసుకు అనిపించింది ఒక్కటే ఈ ఏడాది తెలుగు సినిమా గర్వపడే అత్యుత్తమ చిత్రాల్లో ‘రణబాలి’ కచ్చితంగా ముందు వరుసలో నిలుస్తుంది.”
తమ కెరీర్‌లో ఎన్నో చిత్రాలు చేసినా, 25-30 సినిమాల తర్వాత కూడా చరిత్రలో కలకాలం గుర్తుండిపోయే పర్ఫార్మెన్స్, కథలు కొన్ని మాత్రమే ఉంటాయని, అందులో ‘రణబాలి’ తన కెరీర్‌కే కాకుండా తెలుగు చిత్రసీమకే ఒక తలమానికంగా నిలిచిపోతుందని ధీమా వ్యక్తం చేశారు. సినిమాలు హిట్ అవ్వడం ఇండస్ట్రీ మనుగడకు, బిజినెస్‌కు ఎంతో కీలకమని అంగీకరిస్తూనే, రాహుల్ సంకృత్యాన్ రాసుకున్న ఈ లేయర్డ్ వరల్డ్ ప్రేక్షకులకు చేరడమే అసలైన గెలుపని విజయ్ పేర్కొన్నారు. ట్రైలర్‌లో కనిపించిన యాక్షన్ మాత్రమే కాకుండా, సినిమాలో ఎన్నో భావోద్వేగపు పొరలు ఉన్నాయని, అందుకే పలు కీలక సన్నివేశాలు ప్రేక్షకుల మనసులను బలంగా హత్తుకుంటున్నాయని తెలిపారు.
సినిమా చూసి తీవ్ర భావోద్వేగానికి గురైన ప్రముఖులు, సన్నిహితులు అర్ధరాత్రి దాకా చేసిన ఫోన్ కాల్స్, మెసేజ్లే తనను వెంటనే మీడియా ముందుకు తెచ్చేలా చేశాయని విజయ్ అన్నారు. రష్మికతో సహా చిత్ర బృందం ప్రజల మధ్యకు వచ్చి నేరుగా థాంక్స్ చెప్పేందుకు టూర్ ప్లాన్ చేస్తోంది. ఇందులో భాగంగా విజయవాడ, వైజాగ్, గుంటూరులతో పాటు కథ నేపథ్యమైన అనంతపురం (సింగనమల) ప్రాంతాన్ని కూడా సందర్శించి ప్రేక్షకులతో కలిసి విజయోత్సవాన్ని జరుపుకోనున్నారు. బాక్సాఫీస్ లెక్కల కంటే కంటెంట్ గొప్పతనాన్ని నమ్మి తీసిన సినిమాగా ‘రణబాలి’ తన ఫిల్మోగ్రఫీలో ఎప్పటికీ ప్రత్యేకమేనని విజయ్ దేవరకొండ తేల్చిచెప్పడం టాలీవుడ్‌లో సరికొత్త చర్చకు దారితీసింది.
