Aadarsha Kutumbam: విక్టరీ వెంకటేశ్, మాటల మాంత్రికుడు త్రివిక్రమ్ శ్రీనివాస్ కాంబినేషన్లో తెరకెక్కుతున్న మోస్ట్ అవైటెడ్ మూవీ ‘ఆదర్శ కుటుంబం’పై ప్రేక్షకుల్లో భారీ అంచనాలు ఉన్నాయి. ఫ్యామిలీ ఎంటర్టైనర్గా రూపొందుతున్న ఈ సినిమా అక్టోబర్ 2, 2026న ప్రేక్షకుల ముందుకు రానుంది. అయితే విడుదలకు ముందే ఈ ప్రాజెక్ట్ టెక్నికల్ టీమ్లో చోటుచేసుకున్న మార్పులు ఇప్పుడు ఇండస్ట్రీలో ఆసక్తిని రేకెత్తిస్తున్నాయి. ‘ఆదర్శ కుటుంబం’లో పలువురు కీలక టెక్నీషియన్లు మారినట్లు సినీ వర్గాల్లో జోరుగా ప్రచారం జరుగుతోంది. సినిమాటోగ్రాఫర్గా ఉన్న సను జాన్ స్థానంలో రవి కె. చంద్రన్ బాధ్యతలు చేపట్టినట్లు సమాచారం. అలాగే మ్యూజిక్ డైరెక్టర్ హర్షవర్ధన్ రామేశ్వర్ స్థానంలో ఎస్.ఎస్. తమన్ను తీసుకున్నట్లు తెలుస్తోంది. ఎడిటర్ శ్రీకర్ ప్రసాద్ స్థానంలో నవీన్ నూలి ప్రాజెక్ట్లోకి వచ్చినట్లు సమాచారం.
ఒకే సమయంలో సినిమాటోగ్రఫీ, సంగీతం, ఎడిటింగ్ విభాగాల్లో మార్పులు చోటుచేసుకోవడం ఇప్పుడు ఇండస్ట్రీలో చర్చనీయాంశంగా మారింది. అయితే ఈ మార్పులకు అసలు కారణం ఏమిటనేది మాత్రం ఇప్పటివరకు అధికారికంగా వెల్లడికాలేదు. త్రివిక్రమ్, సదరు టెక్నీషియన్ల మధ్య ఎలాంటి విభేదాలు తలెత్తినట్లు కూడా ఎలాంటి అధికారిక సమాచారం లేదు. కేవలం ప్రాజెక్ట్ అవసరాలు, క్రియేటివ్ కారణాల వల్లే ఈ మార్పులు జరిగి ఉండొచ్చని టాక్ వినిపిస్తోంది. ఇక వెంకటేశ్, త్రివిక్రమ్ కాంబినేషన్ కావడంతో ‘ఆదర్శ కుటుంబం’పై ఇప్పటికే మంచి హైప్ ఉంది. ముఖ్యంగా కుటుంబ ప్రేక్షకులను ఆకట్టుకునేలా హ్యూమర్, ఎమోషన్, ఫ్యామిలీ రిలేషన్స్కు ప్రాధాన్యం ఇస్తూ ఈ చిత్రాన్ని తెరకెక్కిస్తున్నట్లు తెలుస్తోంది. టెక్నికల్ టీమ్లో తాజా మార్పులతో సినిమాకు మరింత కొత్త లుక్, టెక్నికల్ క్వాలిటీ వచ్చే అవకాశం ఉందని అభిమానులు భావిస్తున్నారు. అయితే ఈ మార్పులపై చిత్రబృందం నుంచి అధికారిక ప్రకటన రావాల్సి ఉంది. మొత్తానికి వరుస టెక్నికల్ మార్పులతో ‘ఆదర్శ కుటుంబం’ మరోసారి వార్తల్లో నిలిచింది. అక్టోబర్ 2న సినిమా థియేటర్లలోకి వచ్చినప్పుడు ఈ మార్పుల ప్రభావం తెరపై ఏ స్థాయిలో కనిపిస్తుందో చూడాలి.