Johnny Master vs Sekhar Master: తెలుగు సినీ పరిశ్రమలో ప్రముఖ కొరియోగ్రాఫర్లు జానీ మాస్టర్, శేఖర్ మాస్టర్ వర్గాల మధ్య నెలకొన్న విభేదాలు ప్రస్తుతం టాలీవుడ్లో చర్చనీయాంశంగా మారాయి. తెలుగు ఫిల్మ్ డాన్సర్స్ అసోసియేషన్లో ఎన్నికలు, సభ్యత్వానికి సంబంధించిన అంశాలపై ఇరు వర్గాల మధ్య తీవ్ర వాగ్వాదం చోటుచేసుకున్నట్లు సమాచారం. ఈ పరిణామంతో అసోసియేషన్లో ఉద్రిక్త పరిస్థితులు నెలకొన్నాయని సినీ వర్గాలు చెబుతున్నాయి. అసలేం జరిగిందంటే.. ఫెడరేషన్ అనుమతి లేకుండానే బైఎలక్షన్ నిర్వహించేందుకు కొందరు ప్రయత్నిస్తున్నారనే ఆరోపణలతో వివాదం మొదలైనట్లు తెలుస్తోంది. ఈ అంశంపై జరిగిన సమావేశంలో జానీ మాస్టర్, శేఖర్ మాస్టర్ వర్గాలు పరస్పరం అభ్యంతరాలు వ్యక్తం చేయడంతో పరిస్థితి ఉద్రిక్తంగా మారినట్లు సమాచారం. ఎన్నికల నిర్వహణ విధానం, సభ్యత్వ నిబంధనలపై కూడా ఇరు వర్గాల మధ్య భిన్నాభిప్రాయాలు వ్యక్తమైనట్లు ప్రచారం జరుగుతోంది.
ఈ వివాదానికి నిరసనగా దాదాపు 10 మంది డాన్సర్లు తమ సభ్యత్వాలకు రాజీనామా చేసినట్లు ఇండస్ట్రీ వర్గాల్లో వార్తలు వినిపిస్తున్నాయి. అయితే ఈ రాజీనామాలకు సంబంధించి ఇప్పటివరకు తెలుగు ఫిల్మ్ డాన్సర్స్ అసోసియేషన్ నుంచి ఎలాంటి అధికారిక ప్రకటన వెలువడలేదు. అలాగే ఈ వివాదంపై జానీ మాస్టర్ లేదా శేఖర్ మాస్టర్ కూడా ఇప్పటివరకు బహిరంగంగా స్పందించలేదు. ప్రస్తుతం ఈ వ్యవహారం సినీ పరిశ్రమలో హాట్ టాపిక్గా మారింది. అసోసియేషన్లో నెలకొన్న ఈ విభేదాలు ఎలా ముగుస్తాయి? ఎన్నికల అంశంపై ఫెడరేషన్ లేదా అసోసియేషన్ ఎలాంటి నిర్ణయం తీసుకుంటుందన్నది ఇప్పుడు ఆసక్తికరంగా మారింది. అధికారిక ప్రకటన వెలువడిన తర్వాతే ఈ వ్యవహారంపై పూర్తి స్పష్టత వచ్చే అవకాశం ఉంది.