Vrushakarma Update: ‘తండేల్’ చిత్రంతో బాక్సాఫీస్ వద్ద భారీ బ్లాక్‌బస్టర్ విజయాన్ని సొంతం చేసుకున్న యువ సామ్రాట్ అక్కినేని నాగ చైతన్య, ఇప్పుడు అంతకుమించిన భారీ ప్రయోగంతో సరికొత్త ప్రయాణానికి శ్రీకారం చుట్టారు. వెండితెరపై ఇప్పటివరకు ఎవరూ కనీసం టచ్ చేయని మైథలాజికల్ మిస్టరీ కాన్సెప్ట్‌తో ‘వృషకర్మ’ ప్రేక్షకుల ముందుకు రాబోతోంది. తాజాగా ఈ చిత్రం నుంచి మేకర్స్ వదిలిన సరికొత్త పోస్టర్, ఇంటెన్స్ అప్‌డేట్ సోషల్ మీడియాను షేక్ చేస్తున్నాయి. ఈ భారీ మైథికల్ థ్రిల్లర్ రిలీజ్‌కు కౌంట్‌డౌన్ మొదలైంది. సరిగ్గా 50 రోజుల్లో సినిమా థియేటర్లలోకి అడుగుపెట్టనుందని స్పష్టం చేస్తూ నిర్మాతలు డిసెంబర్ 4న వరల్డ్‌వైడ్ గ్రాండ్‌ రిలీజ్ ఖరారు చేశారు. దీనికి సంబంధించిన సరికొత్త పోస్టర్‌లో చైతూ లుక్, స్క్రీన్ ప్రెజెన్స్ చూస్తుంటే కథలోని డెప్త్, థ్రిల్లింగ్ ఎలిమెంట్స్ ఏ స్థాయిలో ఉండబోతున్నాయో స్పష్టమవుతోంది.
‘విరూపాక్ష’ లాంటి సంచలన మిస్టిక్ హిట్ అందించిన దర్శకుడు కార్తీక్ దండు ఈ సినిమాకు దర్శకత్వం వహిస్తుండటంతో టాలీవుడ్‌లో అంచనాలు ఆకాశాన్ని తాకుతున్నాయి. పురాణాల మిస్టరీ, సైన్స్ అండ్ మైథాలజీ ఫ్యాక్టర్స్, ఊహకందని థ్రిల్ అంశాలతో తెరకెక్కుతున్న ఈ సినిమాలో నాగ చైతన్య తన కెరీర్‌లోనే మునుపెన్నడూ చేయని సరికొత్త కోణంలో కనిపించనున్నారు. లవ్, యాక్షన్ జానర్లను దాటి పూర్తి విభిన్నమైన ప్రపంచంలోకి చైతూ ఎలా ప్రవేశించబోతున్నారన్నది అభిమానుల్లో తీవ్ర ఉత్కంఠ రేపుతోంది.
ఈ చిత్రంలో మీనాక్షి చౌదరి హీరోయిన్‌గా అలరించనుండగా, బాలీవుడ్ నటుడు స్పర్శ్ శ్రీవాస్తవ కీలకమైన విలన్ పాత్రలో చైతన్యతో తలపడనున్నారు. ప్రముఖ నిర్మాణ సంస్థలు శ్రీ వెంకటేశ్వర సినీ చిత్ర, సుకుమార్ రైటింగ్స్ బ్యానర్లపై బి.వి.ఎస్.ఎన్. ప్రసాద్, సుకుమార్ బి. అత్యంత ప్రతిష్టాత్మకంగా ఈ ప్రాజెక్ట్‌ను నిర్మిస్తున్నారు. బాపినీడు సమర్పణలో రూపొందుతున్న ఈ విజువల్ వండర్‌కు ‘కాంతార’ ఫేమ్ అజనీష్ బి. లోక్‌నాథ్ బ్యాక్‌గ్రౌండ్ స్కోర్, రాగుల్ డి. హెరియన్ సినిమాటోగ్రఫీ ప్రధాన బలంగా నిలవనున్నాయి.