Paradha : అనుపమ పరమేశ్వరన్ ప్రధాన పాత్రలో నటిస్తున్న ‘పరాదా’ సినిమాకి సంబంధించిన ప్రమోషన్లు ఎంతో వినూత్నంగా ప్రారంభమయ్యాయి. హరిహర వీరమల్లు స్క్రీనింగ్ సందర్భంగా, పరదాలు ధరించిన కొంత మంది స్త్రీలు థియేటర్లో ప్రత్యక్షమవ్వడంతో అక్కడున్న వాళ్ళ దృష్టి వాళ్లపైనే పడింది. ఈ అడుగు కేవలం ప్రచారాత్మకమే కాకుండా, సినిమాకు సంబంధించిన ప్రధాన భావాన్ని సూచించిందనే చెప్పాలి. చిత్ర దర్శకుడు ప్రవీణ్ కండ్రేగుల గతంలో ‘సినిమా బండి’, ‘శుభం’ లాంటి విభిన్న చిత్రాలతో ఆకట్టుకున్నాడు. ఇప్పుడు ‘పరాదా’ ద్వారా మరొక బోల్డ్ కాన్సెప్ట్ను తెరపైకి తీసుకురావడానికి సిద్ధమవుతున్నాడు.
ఈ చిత్రంలో అనుపమ పాత్ర ప్రత్యేకంగా ఉంటుందనటంలో ఎలాంటి సందేహం లేదు. టీజర్లో ఆమె పాత్రలో కనిపించిన ఎమోషనల్ ఇంటెన్సిటీ, బోల్డ్ ప్రెజెన్స్ సినిమాపై భారీ అంచనాలను పెంచేశాయి. సినిమా చిత్రీకరణ పూర్తయ్యినా కొన్ని కారణాల వల్ల విడుదల ఆలస్యమైంది. అయినా, హరిహర వీరమల్లు విడుదల వేళ చేసిన ఈ ప్రతీకాత్మక ప్రచారంతో ‘పరాదా’ బలమైన సందేశాన్ని ముందుగానే చాటింది. పరదాల వెనుక దాగిన మహిళల స్వేచ్ఛ, అణచివేతపై సినిమా దృష్టిపెడుతున్నట్టు ఈ ప్రచార శైలి సూచిస్తోంది.