Sonali Kulkarni: న్యాచురల్ స్టార్ నాని, డైరెక్టర్ శ్రీకాంత్ ఓదెల కాంబినేషన్లో తెరకెక్కిన మోస్ట్ అవైటెడ్ రస్టిక్ యాక్షన్ ఎంటర్టైనర్ ‘ది ప్యారడైజ్’. సెప్టెంబర్ 24న ప్రపంచవ్యాప్తంగా గ్రాండ్గా విడుదలవుతున్న సందర్భంగా హైదరాబాద్లో నిర్వహించిన ప్రీ-రిలీజ్ వేడుక అత్యంత ఘనంగా జరిగింది. ఈ ఈవెంట్లో ప్రముఖ సీనియర్ నటి సోనాలి కులకర్ణి వేదికపై మాట్లాడిన తీరు, వ్యక్తపరిచిన భావోద్వేగం అందరి హృదయాలను హత్తుకుంది. తెలుగు ఆడియన్స్ ఎనర్జీని, నాని క్రేజ్ను చూసి ఆశ్చర్యపోయిన ఆమె.. తన కెరీర్లోనే ఎప్పుడూ ఇలాంటి అనుభవాన్ని చూడలేదని స్పష్టం చేశారు.
సినీ ప్రియుల అరుపులు, కేరింతల మధ్య మైక్ అందుకున్న సోనాలి కులకర్ణి ఒక్కసారిగా భావోద్వేగానికి లోనయ్యారు. “నేను నా సినీ ప్రయాణంలో ఎన్నో భాషల్లో, ఎన్నో రకాల చిత్రాల్లో నటించాను. కానీ ఇక్కడి తెలుగు ప్రేక్షకుల రెస్పాన్స్, వారికి సినిమా పట్ల ఉన్న పిచ్చిని ఇంకెక్కడా చూడలేదు. ఇది నిజంగా అన్బిలీవబుల్. నాని నువ్వు తెలుగు సినిమాలో సృష్టించిన సామ్రాజ్యం, సంపాదించుకున్న ప్రేమ అసాధారణమైనవి” అంటూ నాని క్రేజ్ గురించి చెబుతూ ఆనందభాష్పాలు రాల్చారు. సినిమా షూటింగ్ అనుభవాలను పంచుకుంటూ.. “ఈ సినిమాలో నేను ‘సమ్మక్క’ పాత్రను పోషించాను. ‘ది ప్యారడైజ్’ కోసం మా టీమ్ మొత్తం రక్తం, చెమట ధారపోసింది. ప్రతి సన్నివేశం కోసం తీవ్రమైన భావోద్వేగాలను అనుభవించాం. ఈరోజు డైరెక్టర్ శ్రీకాంత్, డీవోపీ సాయి, వినయ్లను బాగా మిస్సవుతున్నాను. తమ కష్టానికి ప్రేక్షకుల నుంచి ఇంతటి ఆదరణ దక్కుతున్న వేళ వాళ్లు ఇక్కడ ఉంటే ఎంతో బాగుండేది” అని గుర్తుచేసుకున్నారు.
తెలుగులో పెద్దగా మాట్లాడలేకపోయినా, సినిమాలో నానికి తాను “ఇరుగు దిష్టి.. పొరుగు దిష్టి” తీశానని సరదాగా గుర్తుచేస్తూ అభిమానులను అలరించారు. అలాగే తోటి నటుడు రాఘవ్ జుయల్ గురించి మాట్లాడుతూ.. “రాఘవ్ నాతో తెరపై ఎంతో క్రూరమైన వైరాన్ని చూపించాడు.. కానీ ఆయనతో పనిచేయడం అద్భుతమైన అనుభవం” అన్నారు. హీరోయిన్ కాయదు లోహర్ మరాఠీ చక్కగా మాట్లాడుతుందని, ఆమె తనకెంతో ప్రియమైన అమ్మాయి అని ప్రశంసించారు. వేదికపై ఉన్న ఇద్దరు తల్లుల గురించి ప్రస్తావిస్తూ.. “ఇక్కడ ఒక తల్లి శ్రీకాంత్ ఓదెల మదర్ అయితే, తెరపై నానికి తల్లిగా మరో అమ్మను నేను. ఈ ఇద్దరు తల్లుల కథను సెప్టెంబర్ 24న థియేటర్లలో మీరు ఏ విధంగా ఆదరిస్తారో చూడాలని ఆత్రుతగా ఎదురుచూస్తున్నాను” అని తెలిపారు. యాంకర్ అడిగిన ‘మీ జీవితంలో ప్యారడైజ్ ఎవరు?’ అనే ప్రశ్నకు స్పందిస్తూ.. “ఈ రోజు నన్ను ఇంతగా ఆదరిస్తున్న తెలుగు ప్రేక్షకులే నా అసలైన ప్యారడైజ్” అని చెప్పి వేదికను మరింత ఉత్తేజపరిచారు. ఈ సీనియర్ నటి చూపించిన అంకితభావం, పలికించిన భావోద్వేగ మాటలు ‘ది ప్యారడైజ్’ మూవీలోని ఎమోషనల్ కంటెంట్పై అంచనాలను ఒక్కసారిగా పెంచేశాయి.
