Teja Sajja: ‘హనుమాన్’ సినిమాతో పాన్-ఇండియా స్థాయిలో తిరుగులేని క్రేజ్ సంపాదించుకున్న యంగ్ హీరో తేజ సజ్జా త్వరలోనే బ్యాచిలర్ లైఫ్‌కు గుడ్‌బై చెప్పబోతున్నారు. గత కొన్ని రోజులుగా ఆయన వివాహంపై ఫిలిం సర్కిల్స్‌లో వినిపిస్తున్న వార్తలకు స్వయంగా ఆయనే ఫుల్‌స్టాప్ పెడుతూ క్లారిటీ ఇచ్చారు. త్వరలోనే తాను ఒక ఇంటివాడు కాబోతున్నట్లు అధికారికంగా ధ్రువీకరించారు. తేజ సజ్జాకు కాబోయే భార్య సినీ పరిశ్రమకు చెందిన వ్యక్తి కాదని తెలుస్తోంది. ఆమె అమెరికాలో పెరిగిన ఓ ప్రముఖ వ్యాపార కుటుంబానికి చెందిన యువతి అని తేజ వెల్లడించారు. “ఇది పక్కా పెద్దలు కుదిర్చిన పెళ్లి. మా అమ్మానాన్నలే ఈ సంబంధాన్ని చూసి నిశ్చయించారు” అని ఆయన స్పష్టం చేశారు. అయితే కాబోయే శ్రీమతి పేరు, ఇతర పూర్తి వివరాలను మాత్రం ఆయన ఇంకా బయటపెట్టలేదు. దీంతో ఆ అమెరికా అమ్మాయి ఎవరై ఉంటారనే ఆసక్తి నందమూరి, మెగా, టాలీవుడ్ అభిమానుల్లో జోరుగా మొదలైంది.
ఈ పెళ్లి వేడుకలను అత్యంత వైభవంగా నిర్వహించేందుకు కుటుంబ సభ్యులు ప్లాన్ చేస్తున్నారు. నవంబర్ నెలలో నిశ్చితార్థం (ఎంగేజ్‌మెంట్) జరగనుండగా, డిసెంబర్‌లో వివాహం జరగనుంది. ఈ వేడుకను రాజస్థాన్‌లో డెస్టినేషన్ వెడ్డింగ్ తరహాలో ప్లాన్ చేసినట్లు సమాచారం. అయితే హడావుడి లేకుండా కేవలం ఇరు కుటుంబాల సభ్యులు, అత్యంత సన్నిహితులు మాత్రమే ఈ రాయల్ వెడ్డింగ్‌కు హాజరుకానున్నారు. ‘జాంబీ రెడ్డి’, ‘హనుమాన్’ వంటి వరుస విజయాలతో కెరీర్ పరంగా పీక్ స్టేజ్‌లో ఉన్న తేజ సజ్జా.. ఇప్పుడు వ్యక్తిగత జీవితంలోనూ కొత్త అడుగు వేస్తుండటంతో సినీ ప్రముఖులు, అభిమానులు ఆయనకు శుభాకాంక్షలు తెలుపుతున్నారు.