Hero Movie: టాలీవుడ్ స్టార్ హీరో విజయ్ దేవరకొండ కెరీర్లో అనౌన్స్ చేసి మధ్యలోనే ఆగిపోయిన ప్రాజెక్టుల్లో ‘హీరో’ ఒకటి. ‘డియర్ కామ్రేడ్’ సినిమా తర్వాత విజయ్ దేవరకొండ, డైరెక్టర్ ఆనంద్ అన్నామలై, ప్రముఖ నిర్మాణ సంస్థ మైత్రీ మూవీ మేకర్స్ కాంబినేషన్లో ఈ స్పోర్ట్స్ డ్రామా భారీ స్థాయిలో తెరకెక్కనున్నట్లు ప్రకటించారు. ఈ ప్రాజెక్ట్పై అప్పట్లో ప్రేక్షకుల్లో మంచి అంచనాలు కూడా ఏర్పడ్డాయి. ఇదే సమయంలో సినిమా రెగ్యులర్ షూటింగ్ కూడా ప్రారంభమై, ఫస్ట్ షెడ్యూల్ను కూడా సక్సెస్ఫుల్గా కంప్లీట్ చేసిన తర్వాత అనూహ్యంగా ఈ ప్రాజెక్ట్కు బ్రేక్ పడింది. ఆ తర్వాత ఈ సినిమా గురించి ఎలాంటి అధికారిక అప్డేట్ రాకపోవడంతో ‘హీరో’ నిలిచిపోయిందనే వార్తలు వినిపించాయి.
ఇండస్ట్రీ వర్గాల సమాచారం ప్రకారం.. ఈ సినిమా ఆగిపోవడానికి ఒక్క కారణం కాకుండా పలు కారణాలు కలిసి ప్రభావం చూపినట్లు తెలుస్తోంది. ముఖ్యంగా కథలో మార్పులు చేయాల్సిన అవసరం రావడం, దర్శకుడు – నిర్మాతల మధ్య క్రియేటివ్ డిఫరెన్సెస్ ఏర్పడటం, బడ్జెట్కు సంబంధించిన సమస్యలు తలెత్తడం, అలాగే నిర్మాణ సంస్థ తీసుకున్న కొన్ని కీలక నిర్ణయాల కారణంగా ఈ ప్రాజెక్ట్ను నిలిపివేసినట్లు జోరుగా ప్రచారం జరుగుతోంది. ఈ చిత్రాన్ని స్పోర్ట్స్ బ్యాక్డ్రాప్లో భారీ స్థాయిలో తెరకెక్కించాలని భావించినప్పటికీ, చివరికి వెండితెరపై కనిపించకుండా పోయింది. అయితే ప్రస్తుతం విజయ్ దేవరకొండ మైత్రీ మూవీ మేకర్స్ నిర్మాణంలో రాణబాలి అనే ప్రతిష్ఠాత్మక చిత్రంతో ప్రేక్షకుల ముందుకు రాబోతున్నారు. ఒకప్పుడు హీరో సినిమాతో వెండి తెరపైకి రావాల్సిన ఈ కాంబో ఇప్పుడు మరింత ప్రతిష్ఠాత్మక చిత్రంతో థియేటర్స్లోకి వస్తుందని ఇండస్ట్రీ వర్గాలు చెబుతున్నాయి. ఈ చిత్రానికి రాహుల్ సంకృత్యన్ దర్శకత్వం వహిస్తుండగా, రష్మిక మందన్నా హీరోయిన్గా నటిస్తున్నారు.