తెలుగు మిర్చి రేటింగ్: 3/5
Objection My Lord Review: కోర్ట్రూమ్ డ్రామాలు, లీగల్ థ్రిల్లర్లు ఎప్పుడూ ప్రేక్షకుల్లో ప్రత్యేక ఆసక్తిని కలిగిస్తుంటాయి. అదే జానర్లో సీనియర్ హీరో శ్రీకాంత్ ప్రధాన పాత్రలో తెరకెక్కిన వెబ్ సిరీస్ ‘అబ్జెక్షన్ మై లార్డ్’. సంతోష్ అయ్యప్పన్ దర్శకత్వంలో రూపొందిన ఈ సిరీస్లో అనన్య శర్మ, ముఖేష్ రుషి కీలక పాత్రలు పోషించారు. జీ5 ఓటీటీ వేదికగా స్ట్రీమింగ్ అవుతున్న ఈ సిరీస్ ప్రేక్షకులను ఎంతవరకు ఆకట్టుకుందో చూద్దాం.
కథ
పరశురామ్ (శ్రీకాంత్) ఒకప్పుడు ప్రతిభావంతుడైన లాయర్. న్యాయశాస్త్రంపై మంచి పట్టు ఉన్నప్పటికీ, కొన్ని వ్యక్తిగత కారణాల వల్ల కోర్టులో వాదనలు వినిపించడం మానేసి, నోటరీ పనులతో కుటుంబాన్ని పోషిస్తూ ఉంటాడు. ఈ సమయంలో జూనియర్ లాయర్ వేద (అనన్య శర్మ) అతని వద్ద అసిస్టెంట్గా చేరుతుంది. ఇదే సమయంలో తన కుమార్తె సమీర కిడ్నాప్ కేసులో న్యాయం దక్కకపోవడంతో నారాయణ అనే వ్యక్తి కోర్టు ఎదుటే ఆత్మహత్య చేసుకుంటాడు. ఈ సంఘటన పరశురామ్ జీవితాన్ని మలుపుతిప్పుతుంది. బాధిత కుటుంబానికి న్యాయం చేయాలనే సంకల్పంతో ఆయన మళ్లీ కోర్టులో అడుగుపెడతాడు. సమీరను కిడ్నాప్ చేసింది ఎవరు? ఈ కేసు వెనుక అసలు కుట్ర ఏమిటి? ప్రత్యర్థి లాయర్ విశ్వనాథ్ (ముఖేష్ రుషి)తో జరిగిన న్యాయపోరులో పరశురామ్ ఎలా విజయం సాధించాడు? అనేది మిగతా కథ.
ఎవరు ఎలా చేశారంటే..
శ్రీకాంత్ పరశురామ్ పాత్రలో చాలా హుందాగా నటించారు. మాస్ హీరో ఇమేజ్ను పక్కనపెట్టి, అనుభవజ్ఞుడైన లాయర్గా సెటిల్డ్ పెర్ఫార్మెన్స్ ఇచ్చారు. ఆయన నటన ఈ సిరీస్కు ప్రధాన బలం. వేద పాత్రలో అనన్య శర్మ మంచి నటన కనబరిచారు. కథలో ఆమె పాత్రకు తగిన ప్రాధాన్యత ఉంది. ప్రత్యర్థి లాయర్ విశ్వనాథ్గా ముఖేష్ రుషి తన అనుభవాన్ని చూపించారు. స్నేహాల్ కామత్, జెమిని సురేష్ తదితరులు తమ పాత్రలకు న్యాయం చేశారు. డైరెక్టర్ సంతోష్ అయ్యప్పన్ రచయితగా, దర్శకుడిగా ఆకట్టుకున్నారు. కోర్ట్రూమ్ డ్రామాను అనవసరమైన గందరగోళం లేకుండా ఆసక్తికరంగా తెరకెక్కించారు. అరుణ్ చిలువేరు అందించిన బ్యాక్గ్రౌండ్ స్కోర్ కీలక సన్నివేశాలను మరింత ఎలివేట్ చేసింది. ఎడిటింగ్ కచ్చితంగా ఉండగా, నిర్మాణ విలువలు వెబ్ సిరీస్కు తగిన స్థాయిలో ఉన్నాయి.
ప్లస్ పాయింట్స్
* శ్రీకాంత్ నటన
* కోర్ట్రూమ్ సన్నివేశాలు
* ఆసక్తికరమైన కథనం
* బ్యాక్గ్రౌండ్ మ్యూజిక్
మైనస్ పాయింట్స్
* నెమ్మదిగా సాగే ప్రారంభం
* కొన్ని చోట్ల డ్రామా మరింత బలంగా ఉండాల్సింది
ఫైనల్ వర్డిక్ట్
కమర్షియల్ హంగులు, అనవసర మాస్ ఎలిమెంట్స్పై ఆధారపడకుండా, కథకు ప్రాధాన్యత ఇచ్చిన డీసెంట్ కోర్ట్రూమ్ థ్రిల్లర్ ‘అబ్జెక్షన్ మై లార్డ్’. లీగల్ డ్రామాలు, ఇన్వెస్టిగేషన్ థ్రిల్లర్లు ఇష్టపడే ప్రేక్షకులకు ఈ సిరీస్ ఒక మంచి ఛాయిస్. భారీ అంచనాలు లేకుండా చూస్తే ఇది నిరాశపరచదు.
తెలుగు మిర్చి రేటింగ్: 3/5