తెలుగు మిర్చి రేటింగ్: 3/5
Secret Soldier Movie Review: విదేశీ వ్యవహారాల మంత్రిత్వశాఖ పరిశీలన దాటుకుని థియేటర్లలోకి వచ్చిన ‘సీక్రెట్ సోల్జర్’ మొదటి నుంచే ప్రేక్షకుల్లో మంచి బజ్ క్రియేట్ చేసింది. రొటీన్ ఫార్ములా హంగులకు దూరంగా, బలమైన స్టోరీతో దేశభక్తిని, స్నేహాన్ని మేళవించి డైరెక్టర్ అక్కి విశ్వనాథ్ రెడ్డి తెరకెక్కించిన ఈ చిత్రం ప్రేక్షకులను ఆద్యంతం థ్రిల్ చేస్తుంది.
కథా నేపథ్యం
నెల్లూరుకు చెందిన వలి (నిహాల్ కోదాటి), పృథ్వి (సూర్య శ్రీనివాస్) ప్రాణస్నేహితులు. దేశానికి సేవ చేస్తూ ‘రా’ (RAW) ఆఫీసర్ అవ్వాలన్నది వలి కల. అయితే ఓ ఊహించని వివాదంలో చిక్కుకుని జైలుకు వెళ్లాల్సి వస్తుంది. సరిగ్గా అదే సమయంలో భారత రక్షణ విభాగానికి చెందిన ఓ అత్యంత కీలకమైన సమాచారం లీక్ అవుతుంది. ఈ అంతర్జాతీయ కుట్రను చేధించే ‘సీక్రెట్ సోల్జర్’ మిషన్లోకి ఈ ఇద్దరు సాధారణ యువకులు ఎలా అడుగుపెట్టారు? దేశ భద్రతను ఎలా కాపాడారు? అన్నదే ఈ సినిమా స్టోరీ.
పాజిటివ్ అంశాలు
సాధారణంగా స్పై జానర్ అనగానే కనిపించే విదేశీ లొకేషన్లు, అతిశయోక్తి యాక్షన్ కాకుండా.. నేలవిడిచి సాము చేయని ‘రియలిస్టిక్ అప్రోచ్’ ఈ సినిమా కథకు ప్రధాన ఆకర్షణగా నిలిచింది. ఫ్రెండ్షిప్ను కేవలం కామెడీకే పరిమితం చేయకుండా, జాతీయ భద్రత లాంటి సీరియస్ ప్లాట్కు లింక్ చేసిన విధానం మెప్పిస్తుంది. సెకండాఫ్లో లీక్ మిస్టరీని ఛేదించే క్రమంలో వచ్చే ట్విస్టులు, ఉత్కంఠభరితమైన స్క్రీన్ప్లే ప్రేక్షకులను కట్టిపడేస్తాయి. నిహాల్ కోదాటి వలి పాత్రలో ఎంతో పరిణతి చెందిన నటనను కనబరిచాడు. ఎమోషన్స్, యాక్షన్ సన్నివేశాల్లో ఆకట్టుకున్నాడు. సూర్య శ్రీనివాస్ పృథ్వి పాత్రకు పూర్తి న్యాయం చేస్తూ అద్భుతమైన సపోర్ట్ అందించాడు. కమల్ కామరాజు, శ్రీకాంత్ అయ్యంగార్, రఘుబాబు వంటి అనుభవజ్ఞులైన నటులు కథకు మరింత బలాన్ని చేకూర్చారు.
సాంకేతిక విభాగం
దర్శకుడి ఆలోచనకు సాంకేతిక బృందం చక్కటి సహకారం అందించింది. సినిమాటోగ్రఫీ రియలిస్టిక్ మూడ్ను ప్రతిబింబించగా, ఉత్కంఠను పెంచే బ్యాక్గ్రౌండ్ స్కోర్ (BGM) ప్రతి సీన్ను ఎలివేట్ చేసింది. యాక్షన్ బ్లాక్స్ను సహజంగా తెరకెక్కించడం థ్రిల్ ఫ్యాక్టర్ను పెంచింది. చిన్నపాటి ఎడిటింగ్ లోపాలు పక్కన పెడితే, కథనంలో వేగం ఎక్కడా తగ్గదు. భారీ బడ్జెట్ హంగుల కంటే బలమైన కంటెంట్ను, దేశభక్తిని ఇష్టపడే సినీ ప్రియులను ‘సీక్రెట్ సోల్జర్’ కచ్చితంగా మెప్పిస్తుంది. కొత్త తరహా స్పై థ్రిల్లర్ను అనుభూతి చెందాలనుకునే వారికి ఇది ఒక పర్ఫెక్ట్ వీకెండ్ వాచ్.
తెలుగు మిర్చి రేటింగ్: 3/5