Telangana Cabinet : తెలంగాణ రాష్ట్ర కేబినెట్ బుధవారం జరిగిన సమావేశంలో పలు కీలక నిర్ణయాలు తీసుకుంది. ముఖ్యంగా పంచాయతీ రాజ్ చట్టంలో సవరణలు చేయడంపై కేబినెట్ ఆమోదం తెలిపింది. ఇందులో భాగంగా, స్థానిక సంస్థల ఎన్నికలలో బీసీలకు 42 శాతం రిజర్వేషన్లు కల్పించే విషయమై చర్చలు జరిపి, అందుకు సంబంధించి చట్ట సవరణకు గ్రీన్ సిగ్నల్ ఇచ్చింది.
ఈ మేరకు ప్రత్యేకంగా మరోసారి సమావేశం ఏర్పాటు చేసి, మరింత లోతుగా చర్చించాలని కూడా కేబినెట్ నిర్ణయం తీసుకుంది. గవర్నర్ ఇప్పటికే అసెంబ్లీని ప్రోరోగ్ చేసిన నేపథ్యంలో, ఈ చట్ట సవరణకు అవసరమైన చర్యలపై ప్రణాళిక రూపొందించనుంది ప్రభుత్వం. గతంలో, బీసీ రిజర్వేషన్లు పదేళ్ల పాటు అమలయ్యేలా ఉన్న చట్టానికి మార్పులు అవసరమయ్యాయని అధికార వర్గాలు భావిస్తున్నాయి.
ప్రస్తుత బీసీ జనాభా స్థితిని పరిగణనలోకి తీసుకుని, వారి సామాజిక న్యాయాన్ని పరిరక్షించేందుకు ఈ 42 శాతం రిజర్వేషన్ సవరణను తెలంగాణ ప్రభుత్వం కీలకంగా పరిగణిస్తున్నది. ఈ నిర్ణయం స్థానిక సంస్థల ఎన్నికల నేపథ్యంలో బీసీల రాజకీయ ప్రాతినిధ్యాన్ని పెంపొందించేందుకు దోహదపడుతుందని నిపుణులు అంచనా వేస్తున్నారు.
ఈ నిర్ణయాల వల్ల రాష్ట్రంలో పంచాయతీ రాజ్ పరిపాలన బలోపేతమవుతుందని, సామాజిక సమానత్వానికి మరింత స్థిరత చేకూరుతుందని ప్రభుత్వం ఆశిస్తోంది.