Charan-Sukumar Movie: ‘రంగస్థలం’ లాంటి ఇండస్ట్రీ హిట్‌ తర్వాత గ్లోబల్ స్టార్ రామ్ చరణ్, క్రియేటివ్ డైరెక్టర్ సుకుమార్ కలయికలో రాబోయే ప్రాజెక్ట్‌పై టాలీవుడ్‌లో భారీ అంచనాలు నెలకొన్నాయి. ‘పుష్ప’ సమయంలోనే అధికారిక ప్రకటన వచ్చినప్పటికీ, గ్రౌండ్ వర్క్ మొదలయ్యేందుకు చాలా సమయం పట్టింది. తాజాగా మైత్రీ మూవీ మేకర్స్ ఈ ప్రాజెక్ట్ కోసం సుకుమార్ కొత్త ఆఫీస్ ప్రారంభించిన ఫోటోలను పంచుకోవడంతో అభిమానుల్లో ఉత్సాహం రెట్టింపైంది. అయితే, ఈ సినిమాకు సంబంధించి ఇండస్ట్రీ వర్గాల్లో ఓ సంచలన వార్త తీవ్ర చర్చనీయాంశంగా మారింది.
సుకుమార్ ఏ సినిమా చేసినా ట్యూన్లు కట్టాల్సింది రాక్‌స్టార్ దేవిశ్రీ ప్రసాద్ మాత్రమే. ‘ఆర్య’ నుంచి నిన్నటి ‘రంగస్థలం’, ‘పుష్ప’ వరకూ వీరిద్దరి కాంబినేషన్ బ్లాక్‌బస్టర్ మ్యూజిక్‌ను అందించింది. అలాంటి సుదీర్ఘ అనుబంధాన్ని పక్కనపెట్టి, చరణ్ ప్రాజెక్ట్ కోసం సుకుమార్ సంచలన నిర్ణయం తీసుకున్నట్లు సమాచారం. ప్రస్తుతం సౌత్ ఇండియాను ఊపేస్తున్న సెన్సేషనల్ మ్యూజిక్ డైరెక్టర్ అనిరుధ్ రవిచందర్‌ను రంగంలోకి దించుతున్నారనే వార్త ఫిలింనగర్ సర్కిల్స్‌లో హాట్ టాపిక్‌గా మారింది. దేవిశ్రీ కాదని అనిరుధ్ వైపు సుక్కు మొగ్గు చూపడం సినీ ప్రియులను ఆశ్చర్యానికి గురిచేస్తోంది.
‘పెద్ది’ పూర్తయి నెలలు గడుస్తున్నా చరణ్ తర్వాతి అడుగుపై ఆసక్తికర చర్చ సాగుతోంది. దసరా పండుగ సందర్భాన్ని పురస్కరించుకుని ఈ ప్రతిష్టాత్మక ప్రాజెక్ట్‌ను గ్రాండ్‌గా లాంచ్ చేసేందుకు సన్నాహాలు జరుగుతున్నాయి. అయితే, కథేంటి? చరణ్ సరసన నటించే హీరోయిన్ ఎవరు? అనే కీలక అంశాలపై ఇంకా గోప్యత కొనసాగుతోంది. వచ్చే ఏడాది ప్రారంభంలో రెగ్యులర్ షూటింగ్ మొదలైనా, సుకుమార్ చెక్కినట్టుగా సినిమాను తెరకెక్కించే శైలి దృష్ట్యా ఈ విజువల్ వండర్ థియేటర్లలోకి రావడానికి 2028 లేదా 2029 వరకు వేచి చూడక తప్పకపోవచ్చు.
