Ranabali: టాలీవుడ్ రౌడీ హీరో విజయ్ దేవరకొండ కథానాయకుడిగా తెరకెక్కుతున్న ప్రతిష్టాత్మక పీరియాడిక్ యాక్షన్ డ్రామా ‘రణబాలి’ విడుదల తేదీ దగ్గరపడుతున్న కొద్దీ సినీ వర్గాల్లో హైప్ మామూలుగా లేదు. అయితే గత కొద్ది రోజులుగా ఈ సినిమా టికెట్ ధరల పెంపుపై సోషల్ మీడియా వేదికగా రకరకాల ప్రచారాలు జోరందుకున్నాయి. ఆంధ్రప్రదేశ్‌లో ‘రణబాలి’ టికెట్ల రేట్లు భారీగా పెంచేందుకు నిర్మాతలు దరఖాస్తు చేసుకున్నారంటూ వస్తున్న వార్తలపై చిత్ర నిర్మాణ బృందం తాజాగా స్పందించి పూర్తి స్పష్టతనిచ్చింది. ఆంధ్రప్రదేశ్‌తో పాటు రెండు తెలుగు రాష్ట్రాల్లో టికెట్ ధరల పెంపు కోసం తాము ప్రభుత్వాలకు ఎలాంటి దరఖాస్తులు చేసుకోలేదని చిత్ర యూనిట్ కుండబద్దలు కొట్టింది.
నెట్టింట చక్కర్లు కొడుతున్న ఆ వార్తలన్నీ పూర్తిగా అవాస్తవాలని స్పష్టం చేసింది. సాధారణ ప్రేక్షకుల జేబులకు భారం పడకుండా, అందరికీ అందుబాటులో ఉండే సాధారణ (రెగ్యులర్) ధరలకే సినిమాను ప్రదర్శించబోతున్నట్లు తేల్చిచెప్పింది. ఇటీవలి కాలంలో పెద్ద సినిమాల విడుదల వేళ టికెట్ రేట్ల పెంపు సినీ ప్రియులకు పెద్ద భారంగా మారుతోంది. ఇలాంటి తరుణంలో ‘రణబాలి’ మేకర్స్ తీసుకున్న నిర్ణయం సాధారణ ప్రేక్షకులకు, విజయ్ అభిమానులకు నిజంగా ఊరటనిచ్చే అంశం. రాబోయే పండుగ సీజన్‌లో ఏ విధమైన అదనపు భారం లేకుండా థియేటర్లలో గ్రాండ్ సినిమాటిక్ అనుభూతిని అందించడమే తమ లక్ష్యమని చిత్ర బృందం ధీమా వ్యక్తం చేసింది. ఎలాంటి టికెట్ రేట్ల పెంపు లేకుండానే అక్టోబర్ 16న ‘రణబాలి’ ప్రపంచవ్యాప్తంగా థియేటర్లలోకి రానుంది. రాహుల్ సాంకృత్యాన్ దర్శకత్వంలో విజయ్ దేవరకొండ హీరోగా, రశ్మిక మందన్నా హీరోయిన్ తెరకెక్కిన ఈ చిత్రాన్ని మైత్రీ మూవీ మేకర్స్ నిర్మించారు.
