Vijay Deverakonda: టాలీవుడ్ రౌడీ స్టార్ విజయ్ దేవరకొండ, రష్మిక మందన్న జంటగా టాలెంటెడ్ డైరెక్టర్ రాహుల్ సంకృత్యన్ తెరకెక్కించిన భారీ పీరియాడిక్ ఫోక్ డ్రామా ‘రణబాలి’. మైత్రీ మూవీ మేకర్స్ అత్యంత ప్రతిష్టాత్మకంగా నిర్మించిన ఈ చిత్ర ప్రీ రిలీజ్ ఈవెంట్ హైదరాబాద్‌లో అట్టహాసంగా జరిగింది. ఈ వేదికపై విజయ్ దేవరకొండ చేసిన భావోద్వేగ, పవర్‌ఫుల్ వ్యాఖ్యలు ప్రస్తుతం ఇంటర్నెట్‌ను ఊపేస్తున్నాయి. గతంలో ఎదురైన ట్రోలింగ్స్ నుంచి మొదలుకొని, ‘రణబాలి’ వెనుక ఉన్న 150 ఏళ్ల నాటి భయానక చరిత్ర వరకు అనేక ఆసక్తికర విషయాలను ఆయన పంచుకున్నారు.
గత చేదు అనుభవాలను గుర్తుచేసుకుంటూ విజయ్ మాట్లాడుతూ.. “గతంలో ‘నోటా’ సినిమా సరిగ్గా ఆడనప్పుడు అందరూ నన్ను దారుణంగా ట్రోల్ చేశారు, ఆ వైఫల్యాన్ని నా మీదే రుద్దాలని చూశారు. అప్పుడు నా ఆత్మగౌరవం దెబ్బతిని అందరికీ ఒక ఓపెన్ లెటర్ రాస్తూ.. ‘ఐ విల్ బి బ్యాక్’ అని మాటిచ్చా. ఆ తర్వాత రాహుల్ సంకృత్యన్ దర్శకత్వంలో వచ్చిన ‘టాక్సీవాలా’ సక్సెస్ మీట్ వేదికపై నిలబడి.. ‘వెన్ ఐ సెడ్ ఐ విల్ బి బ్యాక్.. బి బ్లడీ ష్యూర్ ఐ విల్ బి బ్యాక్’ అని గట్టిగా చెప్పాను. మళ్లీ ఇప్పుడు ‘రణబాలి’తో రాహుల్ నాకు అలాంటి మరో గెలుపు వేదికనే సిద్ధం చేస్తున్నాడని నాకు పూర్తి నమ్మకం ఉంది. ఈసారి మనం అనుకున్నది జరిగితే.. ఏకంగా అనంతపురం వచ్చి మీ అందరి ముందే మళ్లీ ఆ మాటను గుర్తుచేస్తా” అంటూ విజయ్ గర్జిస్తుంటే ప్రాంగణమంతా ఫ్యాన్స్ కేరింతలతో హోరెత్తిపోయింది.
ఈ చిత్ర కథా నేపథ్యం గురించి విజయ్ వెల్లడించిన చారిత్రక వాస్తవాలు అందరినీ ఆలోచింపజేశాయి. “దర్శకుడు రాహుల్ పల్లెటూళ్లకు వెళ్లి జాతరలు, బుర్రకథలను పరిశోధిస్తున్న సమయంలో మన చరిత్రలో కనుమరుగైన ఒక భయంకరమైన నిజం బయటపడింది. ఇటీవల తెలంగాణ సీఎం రేవంత్ రెడ్డి గారు సూపర్ ఎల్ నినో పరిస్థితులు రాబోతున్నాయని హెచ్చరించారు. సరిగ్గా 150 ఏళ్ల క్రితం ఇలాంటి సూపర్ ఎల్ నినో వచ్చినప్పుడే బ్రిటిష్ పాలకుల దుర్మార్గాల వల్ల ఏర్పడిన మద్రాస్ మహాకరువులో ఏకంగా 80 లక్షల మంది ప్రాణాలు కోల్పోయారు. ఆకలిని ఒక క్రూరమైన ఆయుధంగా మార్చి బ్రిటీషర్లు చేసిన అరాచకాలే ఈ ‘రణబాలి’ చిత్ర కథ. రాబోయే రోజుల్లో మనం కూడా నీరు, ఆహారం, విద్యుత్‌ను అస్సలు వృథా చేయకుండా కాపాడుకోవాల్సిన అవసరం ఉంది” అని విజయ్ పిలుపునిచ్చారు.
తన కో-స్టార్, రియల్ లైఫ్ పార్ట్‌నర్ రష్మిక మందన్న గురించి విజయ్ మాట్లాడుతూ ప్రశంసల జల్లు కురిపించారు. “మా కాంబినేషన్‌లో వస్తున్న మూడో సినిమా ఇది. ఈ ప్రాజెక్ట్‌కి వచ్చేసరికి నటిగా, ఒక వ్యక్తిగా రష్మిక ఎంత ఎదిగిందో చూస్తుంటే ఎంతో గర్వంగా అనిపిస్తోంది. ఆమె విల్ పవర్, డెడికేషన్ మామూలు మనుషులకు సాధ్యం కాదు.. సెట్‌లో ఒక రోబోలా ప్రాణం పెట్టి కష్టపడుతుంది. కథ రాసుకున్నప్పుడే ‘జయమ్మ’ పాత్రకు రష్మికను తీసుకోవాలా వద్దా అనే ఆలోచనే రాలేదు, ఆ ఇంపాక్ట్ కేవలం రష్మిక వల్లే సాధ్యం. తను నాతో ఉంటే నాకు సొంతింట్లో ఉన్నంత ప్రశాంతమైన ఫీలింగ్ కలుగుతుంది” అని మనసులోని మాటను బయటపెట్టారు.
తెలుగు సినిమా ఖ్యాతిని ఖండాంతరాలు దాటిస్తున్న మైత్రీ మూవీ మేకర్స్ మేకింగ్, అజయ్-అతుల్ అందించిన ‘ఏందయ్యా స్వామి’ క్లాసికల్ చార్ట్‌బస్టర్ సాంగ్, జిష్ణు విజువల్స్ సినిమాను నెక్స్ట్ లెవల్‌కు తీసుకెళ్లాయని విజయ్ కొనియాడారు. దసరా పండుగ కానుకగా అక్టోబర్ 16న ‘రణబాలి’ థియేటర్లలోకి వస్తోందని, సినిమా చూసిన తర్వాత నేరుగా విజయవాడ, అనంతపురం వచ్చి అభిమానులను కలుస్తానని విజయ్ స్పష్టం చేశారు.
