The Paradise Advance Booking: సహజ నటనతో టాలీవుడ్లో తనకంటూ ఓ ప్రత్యేక సామ్రాజ్యాన్ని నిర్మించుకున్న నేచురల్ స్టార్ నాని, ఈసారి ది ప్యారడైజ్తో బాక్సాఫీస్ వద్ద రక్తపాతం సృష్టించేందుకు రెడీ అయ్యారు. ‘దసరా’తో సంచలన విజయాన్ని అందించిన దర్శకుడు శ్రీకాంత్ ఓదెలతో మళ్లీ జతకట్టి తెరకెక్కిస్తున్న ఈ క్రేజీ ప్రాజెక్ట్.. విడుదలకు ముందే విదేశీ గడ్డపై కలెక్షన్ల సునామీ సృష్టిస్తోంది. రిలీజ్కు ఇంకా సమయం ఉన్నప్పటికీ, యూఎస్ బాక్సాఫీస్ వద్ద నాని గత చిత్రాల ప్రీ-సేల్స్ రికార్డులను తిరగరాస్తూ సరికొత్త చరిత్రకు తెరలేపింది. యూఎస్ మార్కెట్లో ఈ సినిమా అడ్వాన్స్ బుకింగ్స్ జోరు చూసి ట్రేడ్ పండితులు సైతం విస్మయానికి గురవుతున్నారు. నాని గత బ్లాక్బస్టర్లు ‘దసరా’ (37 వేల డాలర్లు), ‘సరిపోదా శనివారం’ (50 వేల డాలర్లు) సాధించిన స్టార్టింగ్ ప్రీ-సేల్స్ లెక్కలను ఈ చిత్రం ఇప్పటికే అత్యంత సునాయాసంగా దాటేసింది. ముఖ్యంగా ప్రీమియం ‘XD’ ఫార్మాట్ స్క్రీన్లకు విపరీతమైన డిమాండ్ ఏర్పడటం, ప్రముఖ రీగల్ థియేటర్ల చైన్ మరిన్ని కొత్త థియేటర్స్ను యాడ్ చేస్తుండటంతో టికెట్ల అమ్మకాలు హాట్ కేకుల్లా సాగుతున్నాయి. ఓవర్సీస్ ప్రీమియర్లలోనే నాని కెరీర్ బెస్ట్ ఆల్టైమ్ ఓపెనింగ్స్ నమోదు కావడం ఖాయమని లెక్కలు తేలుతున్నాయి.
ఈ భారీ హైప్కు ప్రధాన కారణం సినిమా బ్యాక్డ్రాప్, డైరెక్టర్ ఎంచుకున్న స్టోరీయే అని తెలుస్తోంది. 1980ల నాటి సికింద్రాబాద్ స్లమ్ నేపథ్యంలో తీవ్రమైన ఘర్షణలు, భావోద్వేగాల కలబోతగా ఈ చిత్రాన్ని మలిచారు. అన్యాయంపై ఒంటరి పోరాటం చేసే పవర్ఫుల్ ఫైటర్గా నాని ఊరమాస్ అవతారంలో కనిపించనున్నారు. రాక్ స్టార్ అనిరుధ్ రవిచందర్ అందిస్తున్న పల్స్ పెంచే బ్యాక్గ్రౌండ్ స్కోర్ తోడవడంతో అంచనాలు ఆకాశాన్ని తాకుతున్నాయి. సాధారణంగా నాని సినిమాలకు క్లీన్ ఫ్యామిలీ ఎంటర్టైనర్లనే ట్యాగ్ ఉంటుంది. కానీ ఈ చిత్రం మాత్రం కంప్లీట్ రా అండ్ బోల్డ్ మేకింగ్తో తెరకెక్కినట్లు స్పష్టమవుతోంది. తీవ్రమైన హింస, రక్తపాతం కారణంగా సినిమాకు ‘A’ (అడల్ట్స్ ఓన్లీ) సర్టిఫికేట్ రావడం పక్కా అని తెలుస్తోంది. సోషల్ మీడియాలో ఫ్యాన్స్ కౌంట్డౌన్ వీడియోలు, పవర్ఫుల్ సౌండ్ ఎఫెక్ట్స్ క్లిప్స్తో రచ్చ చేస్తుండగా.. సెప్టెంబర్ 24న బాక్సాఫీస్ వద్ద సరికొత్త విధ్వంసం మొదలుకానుందని మేకర్స్ కాన్ఫిడెంట్గా చెబుతున్నారు.