Sanjay Dutt: బాలీవుడ్ ప్రముఖ నటుడు సంజయ్ దత్ చేసిన తాజా కామెంట్స్ జాతీయ స్థాయిలో తీవ్ర దుమారం రేపాయి. దేశంలో ప్రస్తుతం శాంతిభద్రతలు గతంలోలా లేవంటూ ఆయన మాట్లాడిన మాటలు రాజకీయ, సామాజిక వర్గాల్లో పెద్ద ఎత్తున చర్చకు దారితీయడమే కాక విమర్శల తుఫానును తెచ్చిపెట్టాయి. వివాదం తీవ్రరూపం దాల్చడంతో ‘సంజూ బాబా’ స్వయంగా రంగంలోకి దిగి ఆ వ్యవహారానికి తెరదించే ప్రయత్నం చేశారు. గాంధీ జయంతి సందర్భంగా నిర్వహించిన ఒక ప్రత్యేక టాక్ షోలో పాల్గొన్న సంజయ్ దత్, భారతీయ సమాజం, ప్రస్తుత పరిస్థితులపై తనదైన శైలిలో స్పందించారు.
ఈ సందర్భంగా ఆయన మాట్లాడుతూ.. భారతీయులు విశాల హృదయులని, ఆతిథ్యానికి పెట్టింది పేరని ప్రశంసిస్తూనే.. గతంలో సమాజంలో కనిపించిన ఆ ప్రశాంతత, సామరస్యం ఇప్పుడు ఎక్కడో లోపించిందని ఆవేదన వ్యక్తం చేశారు. పూర్వపు సద్భావన రోజులు మళ్లీ రావాలని కోరుకుంటున్నట్లు వ్యాఖ్యానించారు. ఒకవేళ దేశానికి ఐదు నిమిషాల పాటు ప్రధాని అయ్యే అవకాశం దక్కితే ఏం చేస్తారనే ప్రశ్నకు స్పందిస్తూ.. తన ఐకానిక్ ‘మున్నాభాయ్’ పాత్ర తరహాలోనే సమాధానమిచ్చారు. బాపూజీ సూచించిన మూడు కోతుల నీతిని (చెడు వినకు, చూడకు, మాట్లాడకు) ప్రస్తావిస్తూ.. సమాజంలో ఎక్కడైనా అన్యాయం లేదా తప్పు జరిగితే చూస్తూ ఊరుకోకుండా దాన్ని తక్షణమే సరిదిద్దే ‘నాలుగో కోతి’ కూడా నేటి కాలానికి అత్యవసరమని చమత్కరించారు.
ఈ మాటలు సామాజిక మాధ్యమాల్లో విస్తృతంగా వైరల్ అయి, విపరీతమైన ట్రోలింగ్ మొదలవ్వడంతో సంజయ్ దత్ క్లారిటీ ఇచ్చారు. ఆ కామెంట్స్ వెనుక ఎలాంటి రాజకీయ దురుద్దేశం లేదని తేల్చిచెప్పారు. “ఆ కార్యక్రమంలో నేను మాట్లాడిన మాటలన్నీ ముందస్తుగా రూపొందించిన స్క్రిప్ట్‌లో భాగం మాత్రమే. పూర్తిగా వినోదం, హాస్యం పంచడానికే ‘మున్నాభాయ్’ డైలాగ్ డెలివరీ తరహాలో మాట్లాడాను. దేశంలో ప్రేమ, సోదరభావం, ఐక్యతను చాటాలనేదే ఆ సంభాషణ వెనుక ఉన్న అసలు ఉద్దేశం. కానీ నా మాటల అంతరార్థాన్ని తప్పుగా విశ్లేషించి వివాదం చేయడం విచారకరం. ఎవరి మనోభావాలనూ కించపరచడం నా ఉద్దేశం కాదు” అని సంజయ్ దత్ స్పష్టం చేశారు. స్క్రిప్ట్ పేరిట సరదాగా మాట్లాడిన మాటలే అయినప్పటికీ, సున్నితమైన అంశాలపై సెలబ్రిటీలు చేసే కామెంట్లు క్షణాల్లో వివాదాస్పదంగా ఎలా మారుతాయో ఈ ఘటన మరోసారి స్పష్టం చేసింది.
