SS Karthikeya: దర్శకధీరుడు ఎస్.ఎస్. రాజమౌళి తెరకెక్కించే భారీ చిత్రాల నిర్మాణంలో వెనుక ఉండి చక్రం తిప్పిన ఆయన తనయుడు ఎస్.ఎస్. కార్తికేయ, ఇప్పుడు పూర్తిస్థాయి నిర్మాతగా అవతారమెత్తారు. విలక్షణ నటుడు ఫహద్ ఫాజిల్ హీరోగా రూపొందిన ‘డోంట్ ట్రబుల్ ది ట్రబుల్’ సినిమాతో కార్తికేయ టాలీవుడ్లో సరికొత్త ప్రయాణాన్ని ఆరంభించారు. హైదరాబాద్లో నిర్వహించిన ఈ చిత్ర ప్రీ-రిలీజ్ వేడుకలో కార్తికేయ ప్రసంగం అందరి దృష్టినీ ఆకర్షించింది. సినిమా ఆఖరి 40 నిమిషాల గురించి ఆయన ఇచ్చిన హామీ, నిర్మాణ రంగంలో తన ప్రయాణంపై చేసిన కామెంట్స్ అభిమానుల్లో అంచనాలను భారీగా పెంచేశాయి.
“సినిమా చివరి 30-40 నిమిషాలు నెక్స్ట్ లెవెల్ అంతే”
తన సినిమా కంటెంట్పై ఉన్న నమ్మకాన్ని వ్యక్తం చేస్తూ కార్తికేయ ఆసక్తికర విషయాలు పంచుకున్నారు. “దర్శకుడు శశాంక్ చెప్పిన కథను విన్నప్పుడు కలిగిన అనుభూతిని అలాగే స్క్రీన్ మీదకి తీసుకొచ్చాం. ఈ సినిమాలో ఫహద్ ఫాజిల్ నటన, సాంకేతిక నిపుణుల పనితనం అన్నీ కలిపి ప్రేక్షకులకు అద్భుతమైన అనుభూతిని ఇస్తాయి. మరీ ముఖ్యంగా సినిమా చివరి 30 నుంచి 40 నిమిషాలు నెక్స్ట్ లెవెల్ అనుభవాన్ని పంచుతుంది. ఆ క్లైమాక్స్ ఎపిసోడ్స్ థియేటర్లలో ప్రేక్షకులకు సరికొత్త కిక్ ఇస్తాయి. అక్టోబర్ 2న థియేటర్లకు వచ్చే ప్రతి ఒక్కరికీ పైసా వసూల్ అనుభూతి ఖాయం” అని కార్తికేయ గట్టి నమ్మకం వ్యక్తం చేశారు.
“మలయాళాన్ని ఏలుతున్నారు.. మా కోసం ఇక్కడికి వచ్చారు”
హీరో ఫహద్ ఫాజిల్ గురించి మాట్లాడుతూ కార్తికేయ కృతజ్ఞతలు తెలిపారు. “ఫహద్ ఫాజిల్ గారు ప్రస్తుతం మలయాళ చిత్ర పరిశ్రమను రారాజులా ఏలుతున్నారు. ఆయనకున్న బిజీ షెడ్యూల్స్ మధ్య మా కథను నమ్మి, మా ద్వారా నేరుగా తెలుగు చిత్రసీమకు పరిచయం అయ్యేందుకు అవకాశం ఇవ్వడం మాకెంతో గర్వకారణం. కథ అనుకోగానే పరుగున వెళ్లి ఆయనకు వినిపించాం. ఆయన నటన సినిమాను మరో మెట్టు ఎక్కించింది. ఆయన మాపై ఉంచిన నమ్మకాన్ని నిలబెట్టుకున్నామని భావిస్తున్నా” అని కార్తికేయ పేర్కొన్నారు.
“బాహుబలి రోజుల నుంచే ప్రొడక్షన్ పాఠాలు నేర్చుకున్నా”
నిర్మాణ రంగంలో తన అడుగుల గురించి ప్రస్తావిస్తూ శోభు యార్లగడ్డ, దేవినేని ప్రసాద్ (చిన్న) లను కార్తికేయ ప్రత్యేకంగా గుర్తుచేసుకున్నారు. “బాహుబలి తెరకెక్కుతున్న రోజుల నుంచే నిర్మాణంలో మెళకువలు, బాధ్యతలు ఎలా ఉంటాయో నేను శోభు గారు, చిన్న గారిని చూసే నేర్చుకున్నాను. అసలైన నిర్మాత ఎలా ఉండాలో వాళ్లే నాకు ఆదర్శం. ఈరోజు నేను ఈ స్థాయిలో నిలబడి ఒక ప్రాజెక్ట్ను పూర్తి చేయగలిగానంటే వారిచ్చిన ప్రోత్సాహం, చూపిన మార్గమే కారణం. అలాగే ఇండస్ట్రీ నుంచి వచ్చి నన్ను ఆశీర్వదించిన తోటి నిర్మాతలందరికీ నా కృతజ్ఞతలు” అని చెప్పారు.
అక్టోబర్ 2న పరీక్ష
ప్రతి అడుగులో తనకు కొండంత అండగా నిలిచే తండ్రి రాజమౌళి, తల్లి రమా రాజమౌళితో పాటు కుటుంబ సభ్యులందరికీ కార్తికేయ ధన్యవాదాలు తెలిపారు. “నేను ఎప్పుడు వెనక్కి తిరిగి చూసినా బాబా (రాజమౌళి), మా ఫ్యామిలీ ఎప్పుడూ నా వెంటే ఉన్నారు. నా ప్రొడక్షన్ టీమ్, అసిస్టెంట్ డైరెక్టర్లు రాత్రింబవళ్లు శ్రమించి సినిమాను ఈ స్థాయికి తీసుకొచ్చారు. ప్రేక్షకులు నాపై చూపిస్తున్న ప్రేమాభిమానాలను ఎప్పటికీ తేలిగ్గా తీసుకోను. మీ అందరూ గర్వపడేలా చేస్తాననే నమ్మకం ఉంది” అని కార్తికేయ ముగించారు. డైరెక్టర్ శశాంక్ ప్రతిభ, ఫహద్ ఫాజిల్ విశ్వరూపం కలగలిసిన ‘డోంట్ ట్రబుల్ ది ట్రబుల్’ అక్టోబర్ 2న గాంధీ జయంతి సందర్భంగా ప్రేక్షకుల ముందుకు రానుంది.
