తెలుగుమిర్చి రేటింగ్ : 3.25/5
ఛాయ్ షాట్స్ రూపొందించిన ‘ధంధా’ వర్టికల్ ఫార్మాట్లో వచ్చిన క్రైమ్ థ్రిల్లర్. 26 చిన్న ఎపిసోడ్స్, మొత్తం 64 నిమిషాల నిడివితో రూపొందిన ఈ సిరీస్ వేగవంతమైన కథనంతో ప్రేక్షకులను ఆకట్టుకునే ప్రయత్నం చేస్తుంది. క్రైమ్, సైబర్ ఫ్రాడ్, డబ్బు కోసం చేసే ప్రమాదకరమైన ఆటల చుట్టూ తిరిగే ఈ కథ ప్రేక్షకులను ఎంతవరకు మెప్పించిందో పూర్తి రివ్యూ లో చూద్దాం.
కథ: అరవింద్ అనే 22 ఏళ్ల బీటెక్ విద్యార్థికి డబ్బు, పవర్పై అమితమైన మోజు ఉంటుంది. తన తెలివితేటలకు కాలేజ్ కంటే హైదరాబాద్ సైబర్ క్రైమ్ ప్రపంచంలో ఎక్కువ విలువ ఉందని తెలుసుకున్న తర్వాత అతని జీవితం పూర్తిగా మారిపోతుంది. చిన్న చిన్న మోసాలతో మొదలైన ప్రయాణం ఫిషింగ్ స్కామ్స్, కాల్ సెంటర్ ఫ్రాడ్స్, ఎక్స్టార్షన్, గ్యాంగ్ వార్స్, డిజిటల్ క్రైమ్ నెట్వర్క్ల వరకు ఎలా చేరుకుంది? ఆ ప్రయాణంలో అరవింద్ ఎంత ప్రమాదకరంగా మారాడు? అనేదే ‘ధంధా’ కథ.
ఎలా ఉందంటే?
దర్శకుడు ఆదిత్య దేవులపల్లి వర్టికల్ ఫార్మాట్కు తగ్గట్టుగా కథను వేగంగా నడిపించాడు. ప్రతి ఎపిసోడ్ చివర చిన్న హుక్ ఇవ్వడం వల్ల తర్వాతి ఎపిసోడ్ చూడాలనే ఆసక్తి కలుగుతుంది. అయితే కొన్ని చోట్ల పాత్రల భావోద్వేగాలకు మరింత సమయం కేటాయించి ఉంటే కథకు ఇంకా బలం చేకూరేది. కొన్ని మలుపులు ముందే ఊహించగలిగేలా ఉండటం కూడా స్వల్ప నిరాశ కలిగిస్తుంది.
దొర సాయి తేజ తన పాత్రలో మంచి పరిణతి చూపించాడు. యూట్యూబ్లో కనిపించే ఇమేజ్కు భిన్నంగా, యాంటీ హీరోగా మంచి స్క్రీన్ ప్రెజెన్స్ కనబరిచాడు. నితిన్ ప్రసన్నతో పాటు ఇతర నటీనటులు తమ పాత్రల పరిధిలో చక్కగా నటించారు.
టెక్నికల్గా చూస్తే అశ్విన్ లెనిన్ సినిమాటోగ్రఫీ, రిషి ఎం బ్యాక్గ్రౌండ్ స్కోర్ సిరీస్కు ప్రధాన బలాలు. ముఖ్యంగా బ్యాక్గ్రౌండ్ మ్యూజిక్ కొన్ని సన్నివేశాలను మరింత ప్రభావవంతంగా మార్చింది. ఎడిటింగ్ కూడా వేగవంతంగా ఉండటం వల్ల సిరీస్ ఎక్కడా ఎక్కువగా బోర్ కొట్టదు.
ప్లస్ పాయింట్స్:
దొర సాయి తేజ నటన
ఫాస్ట్ స్క్రీన్ప్లే
బ్యాక్గ్రౌండ్ స్కోర్
సినిమాటోగ్రఫీ
తక్కువ నిడివి
మైనస్ పాయింట్స్:
కొన్ని మలుపులు ఊహించదగ్గవి
భావోద్వేగాల లోతు కొంత తక్కువ
కొన్ని సహాయ పాత్రలకు సరైన ప్రాధాన్యం లేకపోవడం
ఫైనల్ వర్డిక్ట్:
‘ధంధా’ కొత్త ఫార్మాట్లో ఆసక్తికరమైన క్రైమ్ డ్రామాను అందించే ప్రయత్నం చేసింది. వేగవంతమైన కథనం, దొర సాయి తేజ నటన, మంచి టెక్నికల్ విలువలు ఆకట్టుకుంటాయి. క్రైమ్ థ్రిల్లర్స్ ఇష్టపడేవారు ఒకసారి చూసేయొచ్చు.
తెలుగుమిర్చి రేటింగ్ : 3.25/5
