Vrushakarma: అక్కినేని నాగచైతన్య నయా అవతారంలో కనిపించనున్న భారీ చిత్రం ‘వృషకర్మ’ నుంచి ఫ్యాన్స్ ఎంతో ఆసక్తిగా ఎదురుచూస్తున్న మ్యూజికల్ అప్‌డేట్ రానే వచ్చింది. ‘విరూపాక్ష’ ఫేమ్ కార్తీక్ వర్మ దండు దర్శకత్వంలో అత్యంత భారీ బడ్జెట్‌తో తెరకెక్కుతున్న ఈ మిస్టికల్ థ్రిల్లర్‌పై ఇండస్ట్రీలో ఇప్పటికే భారీ అంచనాలు నెలకొన్నాయి. మీనాక్షి చౌదరి కథానాయికగా నటిస్తున్న ఈ సినిమా ప్రమోషన్లను మేకర్స్ మరింత వేగవంతం చేస్తూ, తాజాగా ఫస్ట్ సింగిల్‌కు సంబంధించిన అదిరిపోయే అప్‌డేట్‌తో ముందుకొచ్చారు.
ఈ సినిమా నుంచి మొదటి పాటగా హీరో ఇంట్రడక్షన్ ట్రాక్‌ను రిలీజ్ చేయబోతున్నట్లు చిత్ర బృందం స్పష్టం చేసింది. ‘స్వాగ్ ఆఫ్ అర్జున్’ పేరుతో సాగే ఈ సాంగ్ తాలూకు చిన్న వీడియో క్లిప్‌ను రిలీజ్ చేసి ఫ్యాన్స్‌లో అంచనాలను ఒక్కసారిగా పెంచేశారు. ‘కాంతార’ ఫేమ్ అజనీష్ లోక్‌నాథ్ అందించిన పవర్‌ఫుల్ బీట్ బ్యాక్‌గ్రౌండ్‌లో అదిరిపోయే రేంజ్‌లో వినిపిస్తుండటంతో, సాంగ్ ఏ రేంజ్‌లో ఉండబోతోందో ఇట్టే అర్థమవుతోంది.
ప్రస్తుతానికి ఈ ఫస్ట్ సింగిల్‌కు సంబంధించిన లిరికల్ రిలీజ్ డేట్‌ను మేకర్స్ అఫీషియల్‌గా లాక్ చేయనప్పటికీ, త్వరలోనే ముహూర్తం ఖరారు చేయనున్నారు. ఇక బీవీఎస్ఎన్ ప్రసాద్ అత్యంత ప్రతిష్టాత్మకంగా నిర్మిస్తున్న ఈ భారీ పాన్-ఇండియా చిత్రం డిసెంబర్ 4న ప్రపంచవ్యాప్తంగా గ్రాండ్‌గా థియేటర్లలోకి రానుంది. ఈ క్రమంలో రాబోయే ‘స్వాగ్ ఆఫ్ అర్జున్’ పాట సినిమా ప్రమోషన్లకు తిరుగులేని కిక్ ఇస్తుందని అక్కినేని ఫ్యాన్స్ ధీమా వ్యక్తం చేస్తున్నారు.
