Ranabali: టాలీవుడ్‌లో అనతికాలంలోనే సెన్సేషనల్ క్రేజ్ సంపాదించుకుని రౌడీ స్టార్‌గా ఎదిగిన విజయ్ దేవరకొండ సినీ ప్రయాణం ప్రస్తుతం అత్యంత కీలకమైన సంధిగ్ధంలో పడింది. ఒకప్పుడు యూత్ ఐకాన్‌గా బాక్సాఫీస్‌ను షేక్ చేసిన ఆయన మార్కెట్.. వరుస ఎదురుదెబ్బలతో ఒడిదుడుకుల్లో పడింది. 2018లో వచ్చిన ‘గీత గోవిందం’, ‘టాక్సీవాలా’ తర్వాత దాదాపు ఎనిమిదేళ్లుగా ఆయన ఖాతాలో చెప్పుకోదగ్గ అసలైన కమర్షియల్ బ్లాక్బస్టర్ పడలేదు. ఈ సుదీర్ఘ నిరీక్షణకు ముగింపు పలకాల్సిన బాధ్యత ఇప్పుడు రాబోయే ‘రణబాలి’ చిత్రంపైనే పడింది. అక్టోబర్ 16న థియేటర్లలోకి వస్తున్న ఈ సినిమా విజయ్ కెరీర్‌కు జీవన్మరణ సమస్యగా మారింది. 2018 నాటి సక్సెస్ జోరు తర్వాత విజయ్ ఎంచుకున్న ప్రాజెక్ట్‌లు ఏవీ ఆశించిన స్థాయిలో బాక్సాఫీస్ వద్ద నిలబడలేకపోయాయి. కంటెంట్ ఉన్నా ‘డియర్ కామ్రేడ్’ కలెక్షన్ల పరంగా బిలో యావరేజ్‌కే పరిమితమైంది. ఆ వెంటనే వచ్చిన ‘వరల్డ్ ఫేమస్ లవర్’ తీవ్ర పరాజయాన్ని మూటగట్టుకుంది. దేశవ్యాప్త హంగామాతో భారీ హైప్ నడుమ విడుదలైన పాన్-ఇండియా చిత్రం ‘లైగర్’ బాక్సాఫీస్ వద్ద ఘోరంగా బోల్తా పడి పెద్ద షాక్ ఇచ్చింది.
ఆ తర్వాత సమంతతో చేసిన ‘ఖుషి’ కొంతమేర వసూళ్లతో ఊరటనిచ్చినట్లే కనిపించినా, ఆ ఊపును ఆయన ముందుకు తీసుకెళ్లలేకపోయారు. మృణాల్ ఠాకూర్‌తో జతకట్టిన ‘ది ఫ్యామిలీ స్టార్’ ప్రేక్షకులను మెప్పించడంలో విఫలమై ఫ్లాప్‌గా మిగిలింది. ఇటీవల భారీ బడ్జెట్‌తో ప్రేక్షకుల ముందుకు వచ్చిన ‘కింగ్‌డమ్’ సైతం తీవ్ర నిరాశే మిగిల్చింది. ఇలా దాదాపు అరడజను సినిమాలు వరుసగా నిరాశపరచడంతో విజయ్ మార్కెట్‌పై తీవ్రమైన ఒత్తిడి నెలకొంది. వరుస పరాజయాలు విజయ్‌ను తీవ్ర ఆత్మరక్షణలోకి నెట్టేశాయి. ప్రస్తుతం ఆయనకు చిన్నపాటి హిట్‌తో సరిపెట్టుకునే వెసులుబాటు లేదు; తన స్టార్‌డమ్‌ను కాపాడుకోవడానికి తిరుగులేని భారీ విజయం తప్పనిసరి. ఈ నేపథ్యంలో అక్టోబర్ 16న ప్రపంచవ్యాప్తంగా విడుదలవుతున్న ‘రణబాలి’ చిత్రంపై టాలీవుడ్ వర్గాల్లో భారీ ఉత్కంఠ నెలకొంది. గత ఎనిమిదేళ్లుగా అందని ద్రాక్షలా ఊరిస్తున్న భారీ విజయాన్ని అందించి, విజయ్ దేవరకొండ బాక్సాఫీస్ పూర్వవైభవాన్ని ఈ చిత్రం తిరిగి తీసుకొస్తుందా లేదా అన్నది చూడాలి.
