Rishab Shetty: ఆస్ట్రేలియాలో ఘనంగా నిర్వహించిన 17వ ‘ఇండియన్ ఫిల్మ్ ఫెస్టివల్ ఆఫ్ మెల్బోర్న్’ అవార్డుల వేడుకలో భారతీయ సినీ పరిశ్రమకు చెందిన పలువురు ప్రముఖులు పురస్కారాలను అందుకున్నారు. విభిన్న కథాంశాలతో ప్రేక్షకులను ఆకట్టుకున్న సినిమాలు, నటీనటులు, దర్శకులను ఈ సందర్భంగా సత్కరించారు. ఈ వేడుకలో కన్నడ నటుడు, దర్శకుడు రిషబ్ శెట్టి మరో అరుదైన ఘనతను సొంతం చేసుకున్నారు. రిషబ్ శెట్టి దర్శకత్వం వహించిన ‘కాంతార: ఏ లెజెండ్ – చాప్టర్ 1’ చిత్రానికి ఆయన ఉత్తమ దర్శకుడిగా అవార్డు అందుకున్నారు. దర్శకుడిగా ఆయన ప్రతిభకు గుర్తింపుగా ఈ పురస్కారం దక్కింది. అంతేకాకుండా ఆయన భారతీయ కథలను ప్రపంచ స్థాయిలో ప్రేక్షకులకు పరిచయం చేస్తున్న తీరుకు గుర్తింపుగా ‘లీడర్షిప్ ఇన్ సినిమా’ అవార్డును కూడా రిషబ్ శెట్టికి ప్రదానం చేశారు.
‘కాంతార’ సినిమాతో రిషబ్ శెట్టి ఇప్పటికే దేశవ్యాప్తంగా ప్రత్యేక గుర్తింపు తెచ్చుకున్నారు. స్థానిక సంస్కృతి, సంప్రదాయాలు, జానపద అంశాలను కథలో మిళితం చేస్తూ తెరకెక్కించిన ఈ చిత్రం ప్రేక్షకులను విశేషంగా ఆకట్టుకుంది. ఇక ఈ వేడుకలో భారతీయ సినీ పరిశ్రమకు చెందిన పలువురు దిగ్గజాలను ప్రత్యేక పురస్కారాలతో సత్కరించారు. ప్రముఖ నటి రేఖకు ‘ఎక్స్లెన్స్ ఇన్ సినిమా’ అవార్డును అందించారు. మూడు దశాబ్దాలుగా సినీ రంగంలో తనదైన ముద్ర వేసిన బాలీవుడ్ నటి రాణీ ముఖర్జీకి కూడా ప్రత్యేక గుర్తింపు లభించింది. అదేవిధంగా దుల్కర్ సల్మాన్, కీర్తి కుల్హరి, విజయ్ వర్మ, రసికా దుగల్ ఉత్తమ నటీనటులుగా పురస్కారాలు అందుకున్నారు. భారతీయ సినిమాకు చెందిన విభిన్న ప్రతిభలను ఒకే వేదికపై సత్కరించిన ఈ వేడుక ఘనంగా ముగిసింది. రిషబ్ శెట్టికి దక్కిన రెండు పురస్కారాలు ఇప్పుడు సినీ వర్గాల్లో ప్రత్యేక చర్చకు దారితీశాయి.
