Irumudi: మాస్ మహారాజా రవితేజ నటించిన తాజా చిత్రం ‘ఇరుముడి’ బాక్సాఫీస్ వద్ద దూకుడు కొనసాగిస్తోంది. శివ నిర్వాణ దర్శకత్వంలో తెరకెక్కిన ఈ యాక్షన్ ఎమోషనల్ డ్రామాపై విడుదలకు ముందే భారీ అంచనాలు ఏర్పడ్డాయి. ఇండియన్ మార్కెట్తో పాటు ఓవర్సీస్లోనూ ఈ సినిమాకు మంచి స్పందన లభిస్తోంది. ముఖ్యంగా ఉత్తర అమెరికాలో ‘ఇరుముడి’ బలమైన వసూళ్లను రాబడుతూ సత్తా చాటుతోంది. విడుదలకు ముందే నార్త్ అమెరికాలో ‘ఇరుముడి’ అడ్వాన్స్ బుకింగ్స్ భారీగా నమోదయ్యాయి. ప్రీమియర్ షోల బుకింగ్స్లోనే 9 వేలకు పైగా టికెట్లు అమ్ముడవగా, 250కి పైగా లొకేషన్లలో వందలాది షోలు బుక్ అయ్యాయి. అప్పట్లోనే ప్రీ-సేల్స్ 1.25 లక్షల డాలర్లను దాటినట్లు నివేదికలు వెల్లడించాయి.
తాజాగా ఈ చిత్రం ఉత్తర అమెరికా మార్కెట్లో ఏకంగా లక్షకు పైగా టికెట్ల విక్రయాల మైలురాయిని అందుకున్నట్లు ట్రేడ్ వర్గాల్లో చర్చ జరుగుతోంది. దీంతో ఓవర్సీస్ మార్కెట్లో రవితేజ క్రేజ్ మరోసారి స్పష్టమవుతోందని అభిమానులు చెబుతున్నారు. సినిమా విడుదలైన తర్వాత కూడా ప్రేక్షకుల స్పందన కొనసాగడంతో ఈ సంఖ్య మరింత పెరిగే అవకాశం ఉందని ట్రేడ్ వర్గాలు అంచనా వేస్తున్నాయి. ‘ఇరుముడి’లో రవితేజ సరసన ప్రియా భవానీ శంకర్ నటించగా, బేబీ నక్షత్ర కీలక పాత్రలో కనిపించింది. తండ్రీకూతుళ్ల అనుబంధం, భావోద్వేగాలు, యాక్షన్ అంశాలను మేళవిస్తూ శివ నిర్వాణ ఈ చిత్రాన్ని తెరకెక్కించారు. జి.వి. ప్రకాశ్ కుమార్ సంగీతం అందించారు. ఇక ఇండియన్ బాక్సాఫీస్ వద్ద కూడా ‘ఇరుముడి’ దూకుడు చూపిస్తోంది. విడుదలైన ఐదో రోజుకే భారత్లో రూ.75 కోట్లకు పైగా నెట్ వసూళ్లు సాధించగా, ప్రపంచవ్యాప్తంగా రూ.100 కోట్ల గ్రాస్ మార్క్ను దాటినట్లు తాజా నివేదికలు పేర్కొంటున్నాయి. మొత్తంగా ‘ఇరుముడి’ రవితేజకు బలమైన కమ్బ్యాక్గా నిలుస్తూ.. ఇండియన్ మార్కెట్తో పాటు ఓవర్సీస్లోనూ తన మాస్ స్టామినాను మరోసారి నిరూపిస్తోంది.
