SS Rajamouli: భారతీయ చలనచిత్ర పరిశ్రమలోనే అత్యంత ప్రతిష్ఠాత్మకంగా తెరకెక్కుతున్న మైథలాజికల్ విజువల్ వండర్ ‘రామాయణ’పై దేశం గర్వించదగ్గ అగ్ర దర్శకుడు ఎస్.ఎస్. రాజమౌళి ప్రశంసల జల్లు కురిపించారు. విజువల్ స్పెక్టాకిల్స్‌తో ప్రపంచ సినీ యవనికపై భారతీయ సినిమా సత్తా చాటిన జక్కన్న లాంటి దిగ్గజ దర్శకుడే స్వయంగా ఈ సినిమా విడుదల కోసం ఎదురుచూస్తున్నట్లు ప్రకటించడంతో సినిమాపై అంచనాలు ఒక్కసారిగా ఆకాశాన్ని తాకాయి. సోషల్ మీడియా వేదిక ‘ఎక్స్’లో రాజమౌళి పెట్టిన పోస్ట్ ఇప్పుడు దేశవ్యాప్తంగా తెగ వైరల్ అవుతోంది. “రామాయణం అనేది ప్రతి భారతీయ స్టోరీ టెల్లర్ చెప్పాలని కలలుకనే ఒక అద్భుతమైన అమర కావ్యం. అలాంటి పవిత్రమైన కథను ఇంతటి భారీ కాన్వాస్‌పై, మునుపెన్నడూ చూడని స్థాయిలో వెండితెరకు తీసుకురావడం నిజంగా ఎంతో ఆనందాన్ని కలిగిస్తోంది. నటీనటులు తమ అద్భుతమైన నటనతో ఆయా పాత్రలకు ప్రాణం పోశారు. ఈ సినిమాను థియేటర్లలో చూడటానికి ఎంతో ఉత్కంఠగా ఎదురుచూస్తున్నాను. చిత్రబృందానికి నా హృదయపూర్వక శుభాకాంక్షలు” అంటూ రాజమౌళి చిత్ర యూనిట్‌ను ఆకాశానికెత్తారు.
నితేశ్ తివారీ దర్శకత్వంలో రూపుదిద్దుకుంటున్న ఈ భారీ చిత్రంలో శ్రీరాముడిగా బాలీవుడ్ స్టార్ రణ్‌బీర్ కపూర్, సీతాదేవిగా నేచురల్ బ్యూటీ సాయి పల్లవి నటిస్తున్న సంగతి తెలిసిందే. వీరిద్దరి స్క్రీన్ ప్రెజెన్స్, లుక్స్ ఇప్పటికే ఇండస్ట్రీ వర్గాల్లో పెను సంచలనంగా మారాయి. రాజమౌళి పేర్కొన్నట్లుగానే ఈ స్టార్ కాస్ట్ తమ పాత్రల్లో ఒదిగిపోయిన తీరు ప్రేక్షకులను కట్టిపడేస్తుందనడంలో సందేహం లేదు. ఈ విజువల్ వండర్‌ను రెండు భాగాలుగా ప్రేక్షకుల ముందుకు తీసుకువస్తున్నారు. ఇందులో మొదటి భాగం ‘రామాయణ: రైజ్ ఆఫ్ ఏ లెజెండ్’ ఈ నవంబర్ 5న ప్రపంచవ్యాప్తంగా గ్రాండ్‌గా విడుదల కానుంది. ఇక ఈ మహాకావ్యానికి సంబంధించిన రెండో భాగాన్ని 2027 దీపావళి కానుకగా విడుదల చేయనున్నట్లు మేకర్స్ ప్రకటించారు. రిలీజ్‌కు సమయం దగ్గరపడుతుండటం, దానికితోడు రాజమౌళి స్వయంగా ఈ ప్రాజెక్ట్‌కు తన పూర్తి మద్దతు ప్రకటించడంతో బాక్సాఫీస్ వద్ద రికార్డుల వేట ఖాయమని ట్రేడ్ వర్గాలు అంచనా వేస్తున్నాయి.
