ఐపీఎల్ 2023లో భాగంగా లక్నో సూపర్ జెయింట్స్ తో జరుగుతోన్న మ్యాచ్ లో చెన్నై సూపర్ కింగ్స్ బ్యాటర్లు రెచ్చిపోయి ఆడారు. దాంతో సీఎస్కే భారీ స్కోరును అందుకుంది. టాస్ ఓడి బ్యాటింగ్ కు దిగిన చెన్నై 20 ఓవర్లలో 7 వికెట్లకు 217 పరుగులు చేసింది. రుతురాజ్ గైక్వాడ్ (31 బంతుల్లో 57; 3 ఫోర్లు, 4 సిక్సర్లు) మరోసారి అర్ధ సెంచరీతో చెలరేగాడు. డెవోన్ కాన్వే (29 బంతుల్లో 47; 5 ఫోర్లు, 2 సిక్సర్లు) రాణించాడు. శివమ్ దూబే (27) వేగంగా ఆడి అవుటయ్యాడు. మొయిన్ అలీ (19), బెన్ స్టోక్స్ (8), జడేజా (3) విఫలం అయ్యారు. అంబటి రాయడు (14 బంతుల్లో 27 నాటౌట్ ; 2 ఫోర్లు, 2 సిక్సర్లు) ధనాధన్ షాట్లతో అలరించాడు. చివరి ఓవర్లో బ్యాటింగ్ కు వచ్చిన ధోని వరుస బంతుల్లో రెండు సిక్సర్లు బాదాడు. దాంతో స్టేడియం ఒక్కసారిగా హోరెత్తిపోయింది. ఇక లక్నో బౌలర్లలో రవి బిష్ణోయ్ 4 ఓవర్లలో 28 పరుగులిచ్చి 3 వికెట్లు తీయగా, మార్క్ వుడ్ 4 ఓవర్లలో 49 పరుగులిచ్చి 3 వికెట్లు తీశాడు.
