Sharwanand: ఎప్పుడూ ఫ్యామిలీ కథలు, రొమాంటిక్ లవర్ బాయ్ పాత్రలతో మెప్పించే శర్వానంద్ ఒక్కసారిగా ఊహించని రీతిలో పక్కా రా అండ్ రస్టిక్ యాక్షన్ బాట పట్టారు. మాస్ డైరెక్టర్ సంపత్ నంది కాంబినేషన్‌లో ఆయన నటిస్తున్న తాజా పీరియాడిక్ చిత్రం ‘భోగి’ టీజర్ విడుదలవడంతోనే టాలీవుడ్‌లో సరికొత్త ప్రకంపనలు మొదలయ్యాయి. టీజర్ మొదలైన క్షణం నుంచే ఒక విభిన్నమైన, మునుపెన్నడూ చూడని ప్రపంచాన్ని పరిచయం చేశారు దర్శకుడు. “అనగనగా ఓ ఊరు ఓ లచ్చా గుమ్మాడి.. ఆ ఊరి పేరు బొగ్గుల గుట్ట ఓ లచ్చా గుమ్మాడి” అంటూ సాగే గ్రామీణ జానపద బాణీ వెనుక దాగిన భయానక వాతావరణం సినిమాపై అంచనాలను ఒక్కసారిగా తారస్థాయికి చేర్చింది.
ఇప్పటివరకు శర్వానంద్‌ను చూసిన తీరు వేరు, ఈ సినిమాలో ఆయన కనిపించబోయే ‘గంగ’ అనే సాధారణ కూలీ అవతారం వేరు. కథ అంతా 1960ల కాలంలో తెలంగాణ – మహారాష్ట్ర సరిహద్దుల్లోని బొగ్గు గనుల బ్యాక్‌డ్రాప్‌లో సాగుతుంది. ఆ కాలం నాటి పరిస్థితులు, ఆధిపత్య పోరు, కూలీల ఆక్రందనలను అత్యంత సహజంగా తెరకెక్కించినట్లు కనిపిస్తుంది. చేతిలో ఆయుధం పట్టి శత్రువులపై విరుచుకుపడే సన్నివేశాలు, టీజర్‌లో కనిపించిన హింసాత్మక విజువల్స్ చూస్తుంటే శర్వానంద్ తన కెరీర్‌లోనే అత్యంత వైలెంట్ రోల్ చేస్తున్నట్లు స్పష్టమవుతోంది. అనుపమ పరమేశ్వరన్ హీరోయిన్‌గా నటిస్తుండగా, గ్లామరస్ బ్యూటీ డింపుల్ హయాతి ఓ కీలక పాత్రలో మెరవనున్నారు. కేకే రాధామోహన్ భారీ బడ్జెట్‌తో ఈ చిత్రాన్ని నిర్మిస్తున్నారు. నవంబరు 12న థియేటర్లలోకి రానున్న ఈ చిత్రం శర్వానంద్‌కు పూర్తి స్థాయి మాస్ ఇమేజ్‌‌ను తెచ్చిపెడుతుందా లేదా అనేది ఇప్పుడు సినీ ప్రియుల్లో ఆసక్తికరమైన చర్చగా మారింది.
