Himesh Reshammiya: బాలీవుడ్ ప్రముఖ సంగీత దర్శకుడు, సింగర్ హిమేష్ రేషమియా వ్యక్తిగత జీవితం మరోసారి చర్చనీయాంశంగా మారింది. సంగీత ప్రపంచంలో తనదైన ముద్ర వేసుకున్న హిమేష్, కెరీర్లో ఎన్నో ఒడిదుడుకులు ఎదుర్కొన్న సమయంలో తన భార్య కోమల్ ఆయనకు అండగా నిలిచారని అభిమానులు గుర్తు చేసుకుంటున్నారు. అయితే దాదాపు 22 ఏళ్ల వైవాహిక జీవితానికి ముగింపు పలికిన ఆయన, అనంతరం నటి సోనియా కపూర్ను వివాహం చేసుకున్నారు. హిమేష్ రేషమియా 1995లో కోమల్ను వివాహం చేసుకున్నారు. వారి దాంపత్య జీవితం రెండు దశాబ్దాలకు పైగా కొనసాగింది. హిమేష్ రేషమియా పలు సందర్భాల్లో మాట్లాడుతూ.. కెరీర్లో సవాళ్లు ఎదురైన సమయంలో కోమల్ తనకు ఎంతో మద్దతుగా నిలిచారని పేర్కొన్నారు.
అయితే హిమేష్ బాలీవుడ్లో మళ్లీ సక్సెస్ బాట పట్టిన సమయంలో ఆయనకు నటి సోనియా కపూర్తో పరిచయం ఏర్పడినట్లు తెలుస్తోంది. కొంతకాలం తర్వాత హిమేష్, కోమల్ పరస్పర అంగీకారంతో విడాకులు తీసుకున్నారు. అనంతరం 2018లో సోనియా కపూర్ను వివాహం చేసుకుని హిమేష్ కొత్త జీవితాన్ని ప్రారంభించారు. ప్రస్తుతం ఈ జంట సంతోషంగా వైవాహిక జీవితాన్ని కొనసాగిస్తోంది. అయితే హిమేష్ వ్యక్తిగత జీవితంపై సోషల్ మీడియాలో ఇప్పటికీ భిన్నాభిప్రాయాలు వ్యక్తమవుతూనే ఉంటాయి. ముఖ్యంగా కష్టకాలంలో ఆయనకు తోడుగా నిలిచిన కోమల్ను విడిచిపెట్టడం సరైందా కాదా అనే చర్చ తరచూ జరుగుతుంటుంది. మరోవైపు వ్యక్తిగత జీవితానికి సంబంధించిన నిర్ణయాలు పూర్తిగా వారి వ్యక్తిగత విషయాలేనని, వాటిని గౌరవించాలని మరికొందరు అభిప్రాయపడుతున్నారు. దీంతో హిమేష్ రేషమియా వైవాహిక జీవితం మరోసారి నెట్టింట చర్చకు దారితీసింది.
