Sidharth -Kiara: బాలీవుడ్ క్యూట్ అండ్ లవ్లీ కపుల్ సిద్ధార్థ్ మల్హోత్ర, కియారా అడ్వాణీ తమ అభిమానులకు ఊహించని సర్‌ప్రైజ్ ఇచ్చారు. సాధారణంగా సెలబ్రిటీలు ఒక బిడ్డ పుట్టిన తర్వాత రెండో సంతానం కోసం కాస్త సమయం తీసుకుంటారు. కానీ ఈ స్టార్ జోడీ మాత్రం తొలి బిడ్డ పుట్టిన ఏడాది తిరిగేలోపే మరోసారి తల్లిదండ్రులు కాబోతున్నామంటూ అధికారికంగా ప్రకటించి అందరినీ ఆశ్చర్యంలో ముంచెత్తింది. “మా హృదయాలు చెప్పలేనంత ప్రేమ, అపరిమితమైన ఆనందంతో నిండిపోయాయి” అంటూ సిద్ధార్థ్, కియారా దంపతులు సోషల్ మీడియా వేదికగా ఈ గుడ్‌న్యూస్‌ను పంచుకున్నారు. తమ జీవితంలోకి సరికొత్త ఆనందం ప్రవేశించబోతోందంటూ వారు చేసిన పోస్ట్ క్షణాల వ్యవధిలోనే నెట్టింట విపరీతంగా ట్రెండ్ అవుతోంది. బాలీవుడ్ సినీ ప్రముఖులు, శ్రేయోభిలాషులు, నెటిజన్లు ఈ జంటకు పెద్ద ఎత్తున శుభాకాంక్షలు తెలియజేస్తున్నారు.
గతేడాది జులై 16న ఈ దంపతులకు ముద్దుల కూతురు జన్మించింది. ఆ పాప పుట్టి ఇంకా ఏడాది పూర్తికాకముందే, అప్పుడే రెండో సంతానాన్ని ఆహ్వానించేందుకు రెడీ అవుతున్నట్లు వెల్లడించడంతో అభిమానులు ఆనందంలో మునిగిపోతున్నారు. 2021లో వచ్చిన ‘షేర్షా’ సినిమా సెట్స్‌పై మొదలైన వీరి పరిచయం కాలక్రమేణా గాఢమైన ప్రేమగా మారింది. తమ ప్రేమ ప్రయాణం గురించి గతంలో ‘కాఫీ విత్ కరణ్’ టాక్ షోలో కియారా మురిపెంగా పంచుకుంది. అనంతరం 2023 ఫిబ్రవరి 7న రాజస్థాన్‌లో అత్యంత వైభవంగా వీరి వివాహం జరిగింది. పెళ్లయిన నాటి నుంచి అన్యోన్య దాంపత్యంతో అందరి దృష్టిని ఆకర్షిస్తున్న ఈ స్టార్ జంట, ఇప్పుడు ఇంత తక్కువ వ్యవధిలోనే రెండోసారి పేరెంట్‌హుడ్‌లోకి అడుగుపెడుతుండటం బాలీవుడ్ సర్కిల్స్‌లో హాట్ టాపిక్‌గా మారింది.
